See ese le Faamasino Sili mai le faamasinoga o Tagaloasa Filipaina

Na amata i le Aso Gafua 26 Oketopa 2009 ona valaau molimau a leoleo i le faamasinoga o Tagaloasa Filipaina Faisaovale, ma isi taulelea e talavou e toalua o loo molia faatasi ma lea tamalii i le umia o laau faasaina o maruana.
O le aoauli o le aso lea na faatoa amata suesueina ai molimau, ina ua manao le itu a leoleo sei saili mai le isi taulealea o loo toatolu ai i latou o loo molia, ona e amata ane le faamasinoga e lei oo atu, ma faapea ona faia ai le tusi saisai e avatu ai. E oo ane lava i le aoauli e lei maua e leoleo, ma faaauau ai pea le mataupu.
O nisi o leoleo na amata ai molimau ma toe faaauau ai i le Aso Lua na sosoo ai, 27 Oketopa.
Peitai na tuai amata ona fofogaina molimau a leoleo ma amatalia taualumaga a le faamasinoga, ona sa iai se talosaga a le alii loia o loo tu mo Tagaloasa Filipaina, o Toleafoa Solomona Toailoa sa ia finauina ai, e le tatau ona tauaveina e le Faamasino Sili, Patu Tiavaasu‘e Falefatu Sapolu, le faamasinoga.
E lima mafuaaga na tuuina atu e le alii loia, peitai na teena le 4 ae talia e le Faamasino Sili le mafuaaga e tasi.
Le mafuaaga lea e faasino i le tulaga o le Faamasino Sili o ia o le taitaifono o le Komiti o le Palola, o loo taoto ai se talosaga e toe ave Tagalosa Filipaina e tuli faauma lona faasalaga soloatoa i moliaga e lua o le fasioti tagata sa nofosala muamua ai.
E mafua le talosaga ona ua toe molia i nisi o soligatulafono e pei ona suesueina ai i moliaga o le umia o se laau malosi e le faatagaina i Samoa, umia o ututau, ma le umia o laau faasaina.
Na talanoaina le talosaga a le alii loia o Toleafoa i se feiloaiga a le faamasino sili ma isi loia o aafia i le faamasinoga i lona ofisa.
Na saunoa Patu Tiavaasu‘e Falefatu Sapolu, ua manatu e sili ona fasee ese ona o lea mafuaaga, ae saili se isi faamasino e tauaveina le mataupu, ae pau lona faanoanoaga o le le faailoaina atu o lea tulaga e le alii loia ina ua amata taualumaga o le mataupu.
O loo iai le fuafuaga a loia a Tagaloasa Filipaina e toe tuuina atu se isi talosaga mo le tatalina i tua o le ua molia e suesue e se isi faamasino.
O se talosaga muamua faapea na teena e le Faamasino Sili, ina ua apo e le faamasinoga mafuaaga a le itu a leoleo e tetee ai i le tatala i tua o lea tamalii, ona o le lamatia o le saogalemu o nisi o molimau a leoleo.
E tasi se moliaga a leoleo faasaga i lē o loo molia ua faaleaoga e le faamasinoga.
O le moliaga lea o le umia o se meafaitino (utensil) ma le faamoemoe e faatino ai solitulafono e fesootai ma laau faasaina.
Na faaleaoga le moliaga ina ua talia e le Faamasino Sili le tetee a le loia a Tagalosa Filipaina, ma loia a isi taulelea e toalua o loo molia faatasi i latou, i le talosaga a loia a le itu a leoleo e toe tolo le mataupu ae sei faatali le lipoti mai le vaega suesue i Niu Sila o le ESR.
Na tetee ia loia i le talosaga ona e umi se taimi sa tolopo ai le faamasinoga ae ua oo ane lava i le aso e suesueina ai moliaga e lei saunia lea lipoti.
E le o iloa la pe toe faaulu le moliaga lea a leoleo aua ua lava nei le taimi e maua ai le lipoti aua o Fepuari o le tausaga fou ua toe tolopo i ai le faamasinoga atoa.