Le Regional Sales Manager NZ/Australia - Mailo Tiaga (Alfred) Senara

Le Regional Sales Manager NZ/Australia – Mailo Tiaga (Alfred) Senara

Sa maua foi se faatalanoaga a se isi tusitala ole Samoa Times ma le susuga Tiaga Senara, o ia lea ua faauluulu iai le ofisa ole vaalele ale atunuu i Niu Sila (Regional Manager), ma ia toe faamautu ai lea polokalame mo le amataga o faigamalaga ale vaalele ile vaiaso asau.

Saunoa Tiaga, ua lava tapena le kamupani vaalele ale Atunuu mo le amataina o lana auaunaga. Ole Aso Lua, aso 14 Novema e sau ai le uluai malaga ale vaalele mai Samoa, ma e pei ona masani ai uluai malaga faapea e tatala ai se auaunaga, ole a agai mai ai nisi o sui ole Malo ma nisi malo faaaloalogia e molimauina le amataga ole auaunaga.

Ona oo loa lea ile Aso Lulu, aso 15 Novema, ole malaga muamua loa lena faapisinisi ale vaalele ole a lele atu ai mai Aukilani agai atu i Samoa, ma faaauau ai loa e pei ona ua iai le faasologa o malaga ile vaiaso.

Ose kamupani vaalele i Italia lea e faatau mai ai le vaalele mo le Samoa Airways, a na ta’ua e Tiaga, mo le uluai 6 masina ole tautua ale Samoa Airways, ole a faatautaia ai pea e pailate mai Italia, faapena foi ia i latou ole a tautuaina pasese i totonu ole vaalele (cabin crew) o i latou uma mai Italia, e faapena foi ile aufaigaluega ole a vaavaaia ma tausia le vaalele ile malaevaalele i Faleolo.

O nei fuafuaga uma ole a galulue faatasi ai pea le vaega lea mai Italia ma i latou ua filifilia ole a galulue tumau ile vaalele, ma maua atili ai nisi toleniga mo latou, ile taimi e tasi o lea foi ua iai i Niu Sila i latou na mo nisi a’oa’oga atili mo le tapenaina ole latou tautua i luga ole vaalele.

Ole fuafuaga ua fetaui ina ia faamautinoa lelei, ole a maua ele mamalu ole atunuu femalagaa’i se auaunaga sili ona lelei ole a faatino ele aufaigaluega ale Samoa Airways mo latou, e ui ose auaunaga fou atu i Samoa, ae o tomai ma le agavaa ole aufaigaluega mai lava i pailate e oo atu ia i latou oloo galulue ile eleele poole malaevaalele, ua atoatoa lo latou silafia ile galuega.

O malaga ile va o Apia ma Aukilani, e tuua Apia ile 7am i taeao o aso taitasi mai le Aso Gafua ile Aso Toonai ae tuua Aukilani mo Apia ile 11am i taeao o aso lava na.

E leai ni malaga ale vaalele ile Aso Sa. Mo le va o Apia ma Sini Ausetalia, o Aso Tofi ma Aso Toonai ua faatulaga iai malaga ile va lena, ae lei ma’oti mai taimi o na malaga.

Ole telē ole vaalele ole a amata ai faigamalaga ale Samoa Airways, ole ituaiga Boeing 737-800, e tali tutusa ma le tele o vaalele ale Qantas lea e felelea’i ile va o Ausetalia ma Niu Sila.

E 170 nofoa ole vaalele, e 8 nofoa ile vaega ole Business Class ma le 162 nofoa ile vaega ole Economy.

Ole susuga Tiaga Senara, e le gata ina faauluulu ia te ia le ofisa ole kamupani vaalele ale Samoa Airways i Niu Sila, ae oloo aofia ai foi i lana matata le itu tau maketi ale kamupani aemaise lava i Niu Sila ma Ausetalia.

Ose tasi o tamafanau a Samoa ua loa lana tautua ma ona tomai ile faatinoga o auaunaga tau kamupani vaalele, e pei ona sa iai ile kamupani ale Polenisia faapea foi le Air New Zealand ma le vaega ale Helloworld lea ua suia mai ai nei ile auaunaga ale vaalele ale atunuu, le Samoa Airways.

Comments

comments