Taofi le pule i le ola
E silia i le 2,000 tagata na auai i le savali faapitoa o le HOPEWALK, na faataunuuina i le Aso Toonai na tea nei, i Aukilani i Saute, lea na amata mai Manurewa seia oo i Papakura.
E ui e 7 kilomita le mamao o le savali, ae lei faavaivai ai le toatele o tagata na auai, aemaise lava tagata Samoa ma le Pasefika.
O le auga o lea faamoemoe, ia faailoa atu ma foia le pule i le ola, ua maliliu ai le toatele o tagata aemaise o fanau tupulaga talavou.
O le mafuaaga lena na a‘e ai se manatu i le susuga i le faafeagaiga Joseph Faafiu, ina ia taumafai ai e faamaopoopo ma faatino lenei savali. “O le matou galuega HopeWalkNZ, e mo tagata lautele, o le taumafai ia talepe le manatu faatauvaa i faafitauli e faatatau i gasegase
o le mafaufau, ma le lagona ooti i le faanoanoa loloto (depression), aemaise le pule i le ola”. “Ia aumai faatasi i latou o loo mafatia ma aafia ona o le pule i le ola, ia iai so latou leo e faalogoina, ia aua ne‘i fefefe e talanoa atu i le isi. Auā afai e faasoa atu o latou lagona mafatia, e maua ai le faamafanafanaga ma se fesoasoani. Na saunoa Joseph Faafiu, o le tausaga 2014 na ia amataina ai lea faalapotopotoga, ina ua tea atu nai tausaga na aafia ai o ia i le mafatiaga i se uo mamae na pule i lona ola.
“O le matou fuafuaga, ia iai se aso faapitoa o le tausaga, o le a faailogaina ai i Niu Sila, ma le lalolagi atoa, e faaigoaina o le aso o le FAAMOEMOE – poo le HOPE day.
O se vaaiga i le solo tele na faatumulia ai e lē gata o mātua, o tamā ma tina matutua aemaise foi le toatele o fanauiti e oo lava i pepe.
O le feau sa laualuga i lea aso, “tatou te malolosi faatasi”, aemaise ia faamalosi atu ia i latou o mafatia ma moomia le toe faafoisia o le faamoemoe. Ia latou iloa, o loo iai se fesoasoani, o loo iai le faamoemoe.
Mo ē fia maua se fesoasoani ma le fia malamalama atili i le foia o le pule i le ola, e mafai ona faafesootai Joseph i le imeli joseph@thegate.co.nz. Telefoni 021467330.
Faamatalaga na tuuina mai
