Tulouna Lau Afioga i le Ao Mamalu o le Malo. Tulouna Lau Afioga i le Sui o le Fono a Sui Tofia. Tulouna Minisita o le Kapeneta. Tulouna Lau Afioga i le Fofoga Fetalai ma le Palemene. Tulouna Lau Afioga i le Faamasino Sili ma le Ofisa o Faamasinoga.
O paia lava ia o Samoa mai Saua seia pā‘ia Fili ma Puletuu. O paia o Aiga ma a latou Tama, o Tama foi ma Aiga, ae ā le Usoga a Tumua ma Pule e Ono i Salafai. Ae o loo ēpa pea foi le Papa-lē-See o le paia i le Aufaigaluega a le Atua……….Taalolo ia!
O le laolao lenei i le tuanai ai o le usuia o le Fono Tele LonaTolu a Malo Aufaatasi mo Atumotu tau Atiae, tatou te nonofo ifo ai ma toe mafaufau i le taunuuga matagofie ua tatou ausia mo la tatou taligamalo.
O upu masani a le atunuu mo se faamoemoe ua iu i le manuia: Ua tini pā‘ō le uto e pei o le faiva i vai. Ua togi pā tau i le ave, ma ua ‘ele foi le matagi ina ua solo i tua āo na i gāgā‘e. Ua pati taoto le Feepo auā ua a‘e mālō i fanua le gogosina sa tofutofu i le vasa loloto. A o upu foi o le Tusi: O le faamoemoe ua taunuu, o le laau lea o le soifua.
E faapena se lagona o le olioli loloto ina ua mae‘a ona fai o se galuega lelei. O le lagona o le fiafia, faamalieina, faaeaina ma le faaatoatoaina. O lagona maualuluga nei e ō faatasi ma le agaga o le faafetai, le faamalo, ma le faagaeetia.
A o le taualuga o nei mea uma, o lo tatou lagona ifo lea o lo tatou faatauvaa ma le lē atoatoa…………..lea na faapea ifo ai lo tatou Alii o Iesu i lona Ausoo: A uma ona outou faia o ia mea, ia outou faapea ifo, o outou o auauna lē aogā.
O le fiafia loloto lena Samoa ma le faamalieina e vaavaalua pea e le agaga o le ootia, e faatupu ai le lagona o le loto maualalo. Aisea? Auā sa tatou taumate i le ‘ete. Sa tū foi i Fagalilo lo tatou faamoemoe pe tau pelē au. Sa na ona faafua foi ae lē iloa pe fati. Sa na ona tatou folafola foi, ae sa lilo pe tino.
Peitai o Samoa o le Atunuu Lotu. O le atunuu e talitonu i le Atua. E faamoemoe mea uma i le Atua. Le Atua lea ua avea ma Faavae Papa o lo tatou Malo. O le ala lea o lo tatou malolosi.
O le mafuaaga foi lea o lo tatou lototele,………..Auā poo le ā lava ni faigata ma ni tugā, tatou te faalagolago i le Mana Lilo mai lugā. Tusa foi pe tatou te vaivai ma lē mafai, tatou te lafoai mea uma i lo tatou Matai.
Avea ia a‘u e faaleo atu ai le faafetai ma le faamalo a lo tatou Malo i tagata uma o lo tatou atunuu, mai mauga tetele seia oo i mauga iti. Mai ona fataloa seia oo i lona vasaloloa, i nuu ma afioaga taitasi, Ekalesia ma faalapotopotoga, aiga ma tagata taitoatasi. Ua tuu faatasi o tatou loto ina ia silasila le lalolagi ma molimau i lou Loto Samoa.
Faafetai i le Aufai Tatalo, auā sa outou punonou i le ao ma le po e faatagisia ni manū lafoia. Ua tali mai le Atua i la outou faatoga, auā ua lolo‘u ifo le lagi i luga o laufanua o Samoa ma Usugafono Mamalu.
Sa ou nofo lava ma mātau le Mana Lilo o a outou tatalo. Ioe, e lei iai se matagi tōfaata‘uta‘u, leai se peau lagavale, se peautā, poo ni peau tagata, e lei iai foi se ūa poo se timu na faalavelaveina taualumaga o le Fonotaga. Sisila ifo Fofoga o le Atua ma faatumau manuia i luga o Lana Aufaigaluega Paia.
Faafetai i le aufaigaluega uma a le Mālo sa fitaituga ma punouai, mai lava i Faauluuluga e oo i sē o pito faatauvaa. Ua outou lē manatu i tou itu taulagi, poo mamalu faalagia o tofiga, ae ua outou “aipalapala” ina ia to manū mo Samoa le atunuu pele, na ia totofi tatou uma, oe ma a‘u, e tautua ia lē pōnā, ona o se galuega ua lē atoatoa.
O uiga ia sailimalo, i se auala maulalo na faataitai mai e lo tatou Taitai‘au Sili, ina ua ia mulumulu vae o ona Soo. Ia lē pupū ai i fale le faataua.
O le mau molimoli mai e sui o Malo uma o le lalolagi na auai mai,….. Se ua faamalo Samoa i au tu ma aga talimalo. Afua mai lava i le malaevaalele – ua tāufu‘a, o fetii o faitotoa, o moli fagu, o le mamā o auala, o nuu ma atu falega, o pā aute ma tagitagi ua teuteu lelei, ae ā pā lauti ma pate mūmū felanulanuai.
Ae faapea foi i faafiafiaga mālie o le Teuila. Ae o le pale o mea uma o le laufofoga fiafia ma le talotalo mai o fanau e pei ua leva ona masani. O le saunoaga faamavae a le Failautusi Aoao o le Fono na faapea ane ai, “Talofa ua outou gāseā, ua lē na o le aufaigaluega a le Malo, a o Samoa atoa.”
O ou tala na o lau taligamalo Samoa. Ua logo ‘ī logo ‘ā ma vaavaai tino mai le lalolagi atoa i ata o le matagofie eseese o au taligamalo. Ua lē gata ina faasalalau atu i initaneti ae o le tuumumusu o le 4,500 o sui lesitala auai i faamamauga a le Malo Aufaatasi.
Faamalo le tauatai, faafetai le sailimalo. Ona o faaiugafono o le fonotaga lenei a le lalolagi ua faaulutala,“The Samoa Pathway” poo “Samoa Ta‘iala”, o le a laugaina ma ta‘uta‘u pea lava pea le igoa o Samoa i laufofoga o failauga ma Taitai o le lalolagi i itu e fā o le kelope i soo se laolao, i aso uma i le lumanai, e talanoaina ai suiga ogaoga o le Tau, ma fofō eseese e moomia e atunuu tau atiae o le lalolagi.
Amata atu i le Asō, ua suia atoa le vaaiga a le lalolagi ia Samoa. O a tatou lava suaga faalotoifale – o “Samoa o le Parataiso” – lea ua gagana mai ai lava i latou. Aisea la tatou te lē ave ai loa lea mo tatou, i le faatumau o le mamā o o tatou laufanua ma uiga lalelei uma ia sa faaalia? Tatou te fiafia ai lava foi tatou e matamata i ai.
Faafetai i le lagapapale i le ‘alamū solo atu o taavale e tuliloa le mau fonotaga ma faalavelave ai ia outou femalagaa‘iga i luga o alatetele, lea ua uma, ma ua toe foi tatou i tulaga taugamalie. Famalō le onosai.
Faafetai Samoa le galulue, faafetai le tauāta‘i, faamalo le onosai. E ui ina ua tatou tali le lalolagi, sa lē iloa foi pe tatou te gafatia, ae faafetai ua tatou faataitai i ai i ia mea faigata. E toe oo mai ni mea faigata faapenei, ua faigofie. O le mea lea, sisila Fofoga o le Atua i au galuega lelei ua fai, totogi foi e le Atua lou no‘oia ma lou apulutia. Toe faatumu e le Atua mea ua e foaia.
Ae ao lava foi ia te au, ona ou momoli le faafetai ma le faamalo i le tapuaiga a le Malo o Amerika Samoa, le paia i le Faleagafulu ma le Nofo a Maopu, faapea le mamalu i Faatui ma Tootoo, auā sa outou tu‘i mai le mulipapaga ma taputapua‘i faiva o Samoa a o feagai ma taligamalo.
O le a lē faagaloina foi tupu ma tamalii ma tagata Samoa uma o loo afifio ma papaaao i atunuu mamao, tatala pea le faamalama ma vaavaai mai. Faamalo le tapuai, faafetai le faitatalo. O lena ua outou silasila i luga o initineti i le matagofie o tapenaga ma taualumaga o le fono a le lalolagi ua usuia i ou laufanua.
Samoa e, i le agaga maualalo, tatou te noanoa ai mea lelei ua maua ma mafai ona tatou fai, ia oo i nifo o le fata faitaulaga, avea ma a tatou taulaga osi e viia ai le Suafa Mamalu o lo tatou Atua. O mea ua mamalu ma āloa, o mea ua matagofie ma ta‘uleleia, fai lea ma viiga o lo tatou Atua.
Soifua.
