Ua toe faaopoopo foi le isi atinae faitele ile itumalo o Falealili, ose fua o galuega faavaitaimi a ana tamafanau, lea na taulamua ma amatamea mai ai le Afioga a Tuatagaloa Joe Annandale.
Pei ona molimauina ile latou Faaaliga ale Aufaigaluega Favaitaimi, a Falealili ma le tatala aloaia ole Manumalo o Poutasi Learning Center. O lenei aso tāua tele ile afioaga, na faia ile Aso Tofi 12 Setema, ma valaaulia atu ai le taitai ole malo, Afioga ile Palemia, Tuilaepa Salele Malielegaoi.
I lana saunoaga na ia talanoa ai: “Ua 10 nei tausaga ole polokalame o galuega faavaitaimi, ma ua faatupulaia le aofai ole aufaigaluega i tausaga taitasi. Ua tatou faipaaga ma kamupani, aemaise o pulega o falefaigaluega i Niu Sila ua le gata ile fesoasoani mai i avanoa faigaluega mo tatou tagata, ae ole atinaeina o tomai ile faaaogāina o komepiuta, ole Gagana Peretania, o Pisinisi Laiti ma isi vaega.
E lata ile $2.3 miliona tala e maua mai i galuega faavaitaimi i tausaga taitasi ma oloo tupu pea. Ole faaaogāina tatau o tupe nei ua atagia ile fausia o fale fou ma faaopoopoga o isi vaega o fale o aiga, o faatoaga, pisinisi ma aoga a fanau aemaise nisi o vaega autū o lenei polokalame, e faapena foi le faatau ai o taavale. O mea ia e vaai mamao iai le Malo ile lumanai.
Ole fiafiaga ia te au, e leai se isi ole vaega ia na o ile savali tetee ina ua suia ele Malo le itu e o ai taavale. Auā ana le suia ele Malo, e le mafai ona aumai ni taavale taugofie mai Niu Sila. Semanu e faapenei o lea e sasa a tatou e taavale taugata.
O pine faamau ua faavasega i ona vaega e 5, ma ole a molimauina faaaliga o faamanuiaga i faatoaga ma taavale a aiga mai le polokalame. Ole manuia o lenei polokalame e o faatasi ma taitaiga lelei, pulega faalenuu, ole faakerisiano aemaise ole faamalumalu a tino matutua ae sili ai le mafuta ile Alii ma le toaga i tapuaiga.
O mea ia e iai a taimi e galo ai i tagata, ole malumalu sili lea ole Atua, o tatou taitoatasi. Ole lauga ale isi faifeau e faapea, ana se’i o tatou manatua, oloo afio le Atua i totonu ia i tatou. Soo se tasi lava e feagai ma faigata, na ona e tatalo musumusu a, ete tau le nofo foi i luga.
Faafetai faapitoa ile afioga a Tuatagaloa Joe Annandale mo lenei poloketi ua manuia ai lo tatou nuu aemaise foi le itumalo pei ona fesoasoani ai itupulaga ma le malosi ole nuu e ala i taitaiga ma pulegalelei.
Ole mea lea ua iai tatou, lea ua faaopoopo mai ma Ausetalia, e ui o lea faatoa amatamata. E tupu pea le toatele e tatala mai o avanoa ia Samoa. E le gata o Samoa ae o isi foi atumotu.
Ole tulaga la ia Samoa, e tele avanoa e tuu mai ia tatou, pe afai e faaauau pea le agaga lea e faavae ai tatou tagata faigaluega. Ole taumafai e avatu i o, ae o lea e amio pulea i totonu o ituaiga polokalame lenei ua faatino e Tuatagaloa ma le Malo. Ia ave na’o tagata e tatau ona ave.
O atunuu i fafo pei o Niu Sila ma Ausetalia, e tele latou tulafono e le malamalamai ai outou. E tele foi uiga e le malamalama iai outou. Aemaise lava le tago ile ‘ava. Ole tele o faafitauli lea e tupu mai le ‘ava. A tagofia le ‘ava, ona e nofo muamua lea ma mafaufau, afai ete faia se mea valea ile taimi ete ‘onā ai, ole taimi ete toe malamalama ai ae ua tupu le faalavelave, e faatietie ai ma oe ile vaalele toe faafoi mai.
Pe a ma le lua tausaga lea e iai e le toe avea ai se isi ole tou nuu. Ole mea lea e tāua ai ile Malo, le aumai o alii ma faipule, auā ole natura ole tagata e masani ai tatou, a alu lava le atalii ia, ua na’o oe lava ete mafaufau iai.
Ete le toe mafaufau poo le ā le amio ale atalii la e fai i o. Ae a tupu loa le faalavelave, faatoa faatāua loa. Ae ole Malo e mamao le vaai i luma e vaavaai ile lautele ole aogā ole polokalame lenei mo fanau a Samoa atoa, aemaise i latou e lei o. Amuia i latou ua o, ua faamanuiaina ua tu o latou fale ma ua fai taavale. Ae faapefea le toatele lea e lei o? E lei oo mai iai le tufa?
Ole ala lena lea e taumafai ai le Malo e matuā faafaigata aiaiga, ina ia lē talia ai se amio valea e tupu i o. Ole mea e masani ona tupu, e ‘onā loa tia’i uma ou mafaufauga ua e le toe kea. E oo lava ile lote lote ole papatua ose tamaitai, ole faamalosi teine le mea lena. Pe na ona e tago atu e milimili le ulu poo le papatua e molia ai a oe ile faamalosi tamaitai. E tele faafitauli e faaono aafia ai ma tatou.
Ole mea lena a oo ina tapena se faigamalga e ave, e faaavanoa a o’u taimi oute sau ai e fai a’u tautalaga ia te outou. O mea e tatau ona outou faaeteete iai, e aua le faia. Ae faatali se’i e toe foi mai i Samoa. Ae ole fai o au amio faavalevalea i o, e aafia ai le lumanai o isi uso ma tuafāfine oloo fia maua le avanoa.
Ole mea la lea, e tāua tele ai le upu ale tamā poo le tina ma le tuualalo ale Afioga ia Tuatagaloa. Vaai le amio pulea. Ae ole tulaga lava ia ile tele o galuega e tupu pea galuega.
Ole taimi lenei, e 9,500 avanoa faigaluega ua faamuta ai tagata faigaluega mai le Pasefika e aofia ai ma Samoa. Ae o Ausetalia, e leai se tapulaa. O lona uiga afai e tatala le tapulaa lea i Niu Sila, tatala mai ma Ausetalia, o lona uiga e uma tatou tagata Samoa e faigaluega i o ae lē uma galuega.
Ae ole mea lena o lea e taumafai iai lo tatou Malo, ole faataoto o tatou polokalame, ina ia avea Samoa ose atunuu e avatu ai ni tagata faigaluega amio pulea.
Ma ole taimi lenei, oloo maualuga tele Samoa, ile tulaga o i latou ia ua filifilia mo tatou polokalame ia.
E tele galuega ua tatala mai fafo, e pei o galuega kamuta mo i latou ua iai tomai faufale, e maua ai le avanoa o fanau ua iu mai Aoga Matata Eseese, e le gata a Ausetalia ae o tatou foi. Ia faaauau pea mea lelei oloo outou faatino.
Ona o lea e taotolua le seuga: Faafetai atu ile mamalu ole Ekalesia Manumalo Papatiso, susuga i Faafeagaiga ma faletua ona o lenei atinae tāua, ua ofoina ai aoaoga faakerisiano ile gagana peretania ma isi tomai e pei ole faaaogāina o komepiuta.
Ua fesoasoani tele i mātua ile saili mamao atu i Apia o aoaoga mo fanau, auā o lea ua iai nofoaga o aoaoga faapea i tua nei. Momoli atu ai le faamalo ona ole lagolago ile taumafai mai ale tatou Malo ma le Matagaluega o Aoga. E tāua lenei atinae ona e faatupulaia ai le maua o avanoa tutusa mo Apia faapea nuu i tua ma Savaii.
E toe faafetai ile afioga a Tuatagaloa na amatamea i lenei nofoaga aemaise ole taitaiga ma le faafoeina ole polokalame o galuega faavaitaimi, lea ua tino mai faamanuiaga e le gata mo lo tatounuu ae ole itumalo faapea fanau aoga.
O fautuaga masani, tatou aeae ia lea manu ua ulu, faaaogā tatau avanoa e le gata mo le au matutua i galuega faavaitaimi ae ole fanau lalovaoa e pei ona taumafai mai le Ekalesia Manumalo Papatiso oloo tatou faipaaga.
Poutasi ma le itumalo o Falealili, amuia outou pe a outou apo pea le malama ma faasusulu ina ia faaauauina auā tupulaga faia’e, ia manuia aiga, nuu, ekalesia ma le malo. Mo a tatou fanau ua aoaoina i lenei nofoaga, toaga e sailia avanoa lē aumaua nei auā lou lumanai manuia.
Lau afioga Tuatagaloa, malo faafetai lea ua molimau le aofia ma le atunuu i au taitaiga lelei auā le manuia lautele. Ia maua pea le malosi mai le Alii e fesoasoani ai i nuu ma afioaga aemaise lo tatou atunuu atoa. Le paia ile Ekalesia Manumalo Papatiso, alofagia ele Atua le auaunaga ia tupu ma ola auā le manuia o a tatou fanau ile lumanai.
