E lei mamao atu na faamanatu ai i Samoa le 60 tausaga talu ona faavae mai St Marys ile tausaga nei, ae na ta‘ua e nisi ole Asosi ale SMOGA i Kuiniselani e tatau lava ona faataunuu se misasā iinei, lea na osia ai ele afioga ia Patele Epati Tamati ile Palisi oloo i Acacia Ridge.
E tolu vaega tāua na faamamafa ile lauga a Patele (1) Ola; (2) Oti; (3) Auaunaga poo le Ola Kerisiano. Na faalautele ele failauga lana saunoaga ile tāua ole ola auauna.
Saunoa a ia, e toatele tagata e feoti lava latou i lo latou loto malie talu ai faafitauli ole olaga ae lē o finagalo iai le Atua. E toatele foi nisi na ole feola lava ae lē o faatāua le ola mai le Atua, ae toatele foi ma i latou oloo soifua ae mautinoa lo latou valaauina, e malie foi o latou loto ia latou galuega ile olaga nei.
Ose isi apoapoaiga na ia saunoa iai ile ola na ola ai le mauoa e pei ona lauiloa ile Tusi Paia, sa ola faapito lava na o ia, e lē fia fesoasoani i tagata matitiva, e mitamita ile tele o ana ‘oa, e oo lava ia Lasalo na lē fia fesoasoani foi iai.
Na toe faapupula e Patele le oti ole mau‘oa male oti o Lasalo poo le ā le eseesega? Ia lena ua silafia uma ele aufaitau.
Ole fesili masani lava a soo se failauga pe a oo ina taufaaiuiu se lauga ole ‘auga foi lea male tuufaatasiga ose feau faamalosi.
“Ae toafia la i tatou o faafofoga mai oloo tumau lava lona alofa faapito ia te ia lava? E lē fia fesoasoani atu?
E lē fia tufa atu? E lē fia alofa atu ae tau lava o upu ma tala?”
“E faapena lenei aso ma lona tāua i nisi o alii ma tamaitai tuai o Aoga ale Katoliko oloo soifua ma ola i atunuu i fafo e oo foi ile SMOGA e pei ona autu iai le asō.”
E iai foi a latou fuafuaga ma aiga oloo tausi peitai oloo faatāua le ola fesoasoani atu e ala ile ofoina o o latou taimi ma ni vaega o a latou seleni mo nisi aemaise alo ma fanau ile aoga a St Marys i Samoa.
Na ta‘ape le aofia ua iloga ona laulelei i upu faalaeiau ole aso na saunoa iai Patele Epati aemaise se faamalosiau i tamaitai tuai i totonu ole Asosi ale SMOGA (St Marys Old Girls Association) e finau ma faamalolosi e faataunuu galuegafai ole taufaaiuiuga o lenei tausaga, e lē vale so latou taui mai le Atua.
E feololo lava nai tamaitai oloo i totonu ole Asosi ile taimi nei faatasi male lagolago a nai o latou aiga.
