Sauniga Lotu Tuufaatasi ona ua afaina malumalu i le mafui‘e

Talu ai le lūlūina o le mafui‘e i le taeao o le Aso Toonai 4.09.2010 na faapea ona toe afaina ai le malumalu o le ekalesia St Pauls Pacific Trinity i le taulaga ma lē mafai ai ona faataunuuina le latou sauniga i le Aso Sa o le Talalelei, faapena foi ma le faaleagaina o le falesa ekalesia Knox Presbyterian faatasi ai ma nisi o aulotu tulata ane.

O lea la sa mafai ona tuufaatasia le latou tapuaiga i le malumalu St Andrews ma faataunuu ai ma le sakalameta o le faamanatuga.

O susuga lava i alii faifeau mai aulotu e tolu sa taitaia le sauniga faatasi ai ma le faafeagaiga o le ekalesia St Pauls Pacific Trinity, Rev Lapana Faletolu, ma sa faatumulia le falesa i nai uso palagi, o uso atumotu aemaise ai le mamalu o le atunuu sa auai.

O lenei foi lotu tuufaatasi sa talosia ai tagata lautele o le aai ua mafatia talu le mafui‘e, o le atuatuvale ma le popole, o le mativa ma le fia inu atoa ma ni faamai eseese e aliali mai. E iloa le tagata tautua ma le faamaoni ma le alofa i aso vale.

O le tulaga faigata ua feagai nei ma Kalaiesetete, e ao ai ona vaai i tua ma le agaga faafetai ae silasila toto‘a i luma ma le loto faatuatua i le Atua. Ia vaai solo i o tatou tuaoi ma le alofa, ma galue ma le lē faalogologotiga ma ia maua le agaga o le maopoopoga ma le loto masaga e fai ai soo se mea e talitonu o mea lelei mo se manuia o tagata mafatia aemaise ekalesia.

Malo le onosai, Malo le finafinau auā ua mautinoa ua lē faatali i ni fesoasoani, ae ua taulamua ona fai le fesoasoani muamua mo le saogalemu o le soifua.