O le ono ai lenei o tausaga talu ona faamanatu pea i Brisbane e le aiga o Sā Leaupepe Talamatāvao i Filia i Faleasiu (Au Salamo) lenei lotu sili ona tāua i totonu o le aiga, e manatua ai pea nai tuaa ma i latou ua tofafā.
O lenei foi sauniga e faamanatu foi e le toatele o le aiga i Niu Sila e aofia ai Ueligitone ma Aukilani, faapea Samoa ma isi atunuu o taapea ai le toto o le aiga.
O le taeao o le Aso Toonai, aso 15 o Ianuari i le itula e sefulu na faataunuuina ai lea sauniga masani e faasino tonu lava i paolo ma gafa, alo ma fanau a le aiga, lea e faaailogaina i le aso 15 o Ianuari i tausaga uma e pei ona tasi i ai le tofā ma le moe.
Ua atoa nei le 109 tausaga o lenei lotu e pei ona amata mai i le tausaga e 1902.
Na taitaia le sauniga e le Toeaina Penisione malolo o le EFKS, susuga ia Samuelu Tu‘iai, o ia foi sa ia tapenaina se upu faamalosi ma o se upu faalaeiau matagofie na saunoa i ai lana auauna e faatumauina ai le fealofaniga o le aiga atoa.
O le Afioga Paia a le Atua, sa faitauina le Feagaiga Tuai o Shalom Tu‘ifao, a o le feagaiga Fou sa fofogaina e Junior Tautiepa. O le tala o le lotu sa fofogaina e le susuga ia Leleiga Tu‘ifao Anae.
O talosaga sa molimolia le faafetai e le faletua manumalo ia Tima Tu‘iai, Faatoesega o le afioga i le taitaifono ia Tutasi Manusina, ma manaoga sa fofogaina e le tina matua ia Peka Tu‘ifao.
Na lagiina lava viiga e le aufaipese siufofoga mālie a le aiga. Na molimauina le faatumulia o lea sauniga i aiga, uo ma ē masani.
O nisi o lupe faalele a le aiga sa mafuta ai i lea aso, o le susuga i le Toeaina ia Tauaaga ma le faletua ia Senerita Mataafa, (Toeaina taitai o le EFKS Pulega Purisipeni i Saute).
O le malumalu lea o le susuga i le toeaina sa faataunuuina ai le sauniga, lea na faato‘ā mae‘a ona faaulufale i le tausaga ua mavae.
O se tasi o faafeagaiga o le susuga ia Petaia Tu‘ifao ma le faletua ia Sarai EFKS Southside, faapea le susuga i le faafeagaiga ia Lance ma le faletua ia Lite Tautiepa (EFKS Westside).
Sa tapenaina lava e le paia ma le mamalu o le aiga le taumafataga, ma sa matagofie faafiafiaga a alo ma fanau.
O se fiafiaga sili ona tāua i alo ma fanau lenei aso faapitoa ona o loo mafai pea ona maua le soifua laulelei o le susuga i le Toeaina penisiona malolo ia Samuelu ma le faletua ia Tima Tu‘iai, faapea le taitaifono ia Tutasi Manusina aemaise ai le tina matua ia Peka Tu‘ifao ma nisi o toe ulutaia o loo talosiaina tamafanau i le galuega a le Atua ma soo se vaega.
O si tina matua lea o Peka Tu‘ifao sa faamanatuina le 85 tausaga o lona soifua i le aso 4 o Ianuari o le tausaga nei.
Tau ina ia alofagia e le Atua ma faamanuia atu ina ia toe aulia atu le isi lotu faamanatu i lena tausaga fou 2012 pe a tusa ai ma lona finagalo paia.
