E le’o iai se popolega ile Minisita o Tupe Maua a Samoa le Afioga ia Tialavea Tionisio Hunt e faatatau ile mataupu e pei ona tete’e ai le EFKS e ala ile le mafai ona o latou totogi ai lafoga e pei ona pasia ai e le Malo o Samoa. O lea mataupu na faaiugafonoina ile Fonotele talu ai a le EFKS i Malua.
Talu ai nei na faasalalau ai i luga o alaleo faasalalau a le atunuu le tatau lea ona resitala uma fa’afeagaiga o soo se Ekalesia mo le totogiina o lafoga a le Malo ao lei aulia atu le aso 30 o le masina lenei o Iuni, peitai e foliga mai o lo o tete’e pea le finagalo o le EFKS ile le mafai lea ona totogi tax a latou faifeau. Ua tuuina atu ai nei le lapataiga mulimuli a le Minisita o gafa ai ma lea lafoga le Afioga ia Tialavea i soo se faafeagaiga ile tatau lea ona resitala ai mo le totogiina o lea lafoga, afai ae oo atu ilea so 30 o le masina lenei o Iuni e lei resitala lava nei faafeagaiga ona aga’i loa lea o le Malo e molia uma nei faafeagaiga, ma e le o popole foi le Afioga ile Minisita ile faatino ai o moliaga mo i latou nei, saunoga manino lea a Tialavea.
Faailoa mai e Tialavea ile tatou nusipepa, e leai se isi e i luga atu o le tulafono a le Malo ma e leai foi se faiga faapitoa mo soo se Ekalesia poo soo se faifeau ina ia faamalieina, e tatau lava ona usitaia uma ma faamalieina le tulafono e pei foi ona usitaia uma e isi Ekalesia. Taua e Tialavea, ua tele le taimi na tuuina atu e le Malo e soalaupule ai ma faamalamalama lenei tulafono ao lei pasia ai ile amataga o le tausaga lenei peitai e foliga mai o lo o mananao le EFKS e liliu atu le finagalo o le Malo ise mea e finagalo iai le Ekalesia, ma e le talafeagai lea vaega, e leai foi se Malo faavalevalea ua fai se tulafono ae toe tolopo ina ia faamalieina se finagalo o se sui e toatasi.
E pei ona silafia o le tax lenei na pasia ai e le Malo ma amata aloaia mai ai ile masina o Ianuari o le tausaga lenei e pei ona totogi ai lafoga mo faafeagaiga faatasi ai ma le Ao o le Malo. Ma e ui na tele lava ni finauga ma manatu eseese o latou na faaalia ai ae na lagolago lava e le tele o Ekalesia lea lava e oo mai ile taimi lenei ua usitaia lava lea lafoga.
O le finau a le Afioga ile Minisita ia Tialavea o lo o ia faamamafa mai ai, o tatou o tagata e tautua lotu ma faaaloalogia foi auauna a le Atua, ma o ia le isi tagata e matua ave lava lana faaaloalo i lana faifeau peitai e leai se isi e sili atu ile tulafono ua uma ona pasia e le Malo, e tatau foi la i faafeagaiga ona o latou usitaia lea tulafono e tusa foi ma le upu folafola a le Atua o lo o latou laugaina i falesa ina ia usitaia ai e tagata lotu taitasi.
O lo o silafia foi e Tialavea le inosia o ia e tagata lotu ona o le lafoga lenei peitai na ia faamanatu mai, ua maea lana tautoga na fai i luma o le Malo atoa ai ma luma o le Atua ile taimi na faatauto ai o ia ile tofiga Minisita lenei, ma o lea e nate faatinoina lea tautoga ona o lona manatu ile manuia o le atunuu ile lumana’i.
Saunoa Tialavea, ua iai foi faitioga ua oo atu ia te ia ile faaono faaletonu ai lea o sona avanoa mo le isi faiga palota ona o lafoga nei a faifeau peitai na ia faapupula mai e leai ma sona popole i lea vaega, ma e le kea foi pe a le toe tu mai ile isi faiga palota ae o le vaega sili o lo o ia faatino lona tofiga na valaauina ai o ia e le Atua ile Malo.
O lo o tumau pea le finagalo o le Afioga ile Minisita o tupe maua a le Atunuu, Tialavea Tionisio Hunt, ua ia sauna foi e molia uma faafeagaiga e oo atu ile faaiuga o le masina lenei o Iuni ae lei resitala mo le avanoa e totogi ai lafoga nei a le Malo, ma e leai foi se isi e sili atu i luga o le tulafono.
