Ole maliega a suli e toatolu ole suafa Tupu ole Malietoa na autasi iai ile feiloaiga na faia ile maota o Poutoa i Sapapalii ia Iuni ole tausaga ua mavae atu nei (2017), ua faamaonia ele Faamasinoga o Fanua ma Suafa i lana faaiuga na fofogaina ile Aso Faraile 22 o Tesema 2017. O lea maliega a suli e aofia ai Talavou, Natuitasina ma Moli na tusi aao ai e faaee le suafa Malietoa ile susuga Papaliitele Faamausili Moli Malietoa. Ole ioega foi lea na faataoto ai e suli ma aiaiga e faasolo ai le suafa pe a mae’a se Nofo.
O lea aiaiga ua malilie ai a mae’a le nofo a suli a Moli lea ole a seei ai Papaliitele Faamausili Moli, ona sosoo lea ma se nofo a suli o Natuitasina, sosoo ai ma se nofo a suli o Talavou.
E 12 masina e tuu atu ile suli ua oo iai le faasologa e filifili ai se latou nofo, peitai a mae’a le 12 masina e lei maua se autasiga ona see lea ole filifiliga ile suli ua sosoo ai. Afai foi e uma le 12 masina lea e lei maua foi se tasi ona oo lea ole faasologa i suli sa nofoia le suafa Malietoa.
Ole faasalalauga ile autasiga a suli e nofo Papalii Faamausili Moli ile suafa Malietoa e tausia le aiga, na faalavelave iai nisi o suli o Moli. Ole faalavelave a nisi o suli o Talavou sa latou lagolago e nofo Papalii Faamausili ile suafa ole aiga ae sa teena le aiaiga e 12 masina. Sa latou faaalia e 30 aso na malilie iai ile feiloaiga na faia ile maota o Poutoa ia Iuni ole 2017, peitai ole silasila ale faamasinoga, ole suafa Malietoa ose tasi o suafa maualuga o Samoa ma e lē mafai ona vave maua se autasiga ise filifiliga i totonu ole 30 aso pe tusa foi lava ole 12 masina poo le sili atu.
Ole faaiuga ale faamasinoga ua talafeagai le 12 masina. Ole faalavelave a nisi o suli o Moli sa latou teena ai le autasiga ile nofo o Papalii Faamausili.
Na faaalia ile faaiuga ale faamasinoga ole faigata ole lagolagoina e ia suli o Moli ole finagalo o suli e toatolu ona oloo fia nofo foi se tasi o suli o Moli ile suafa Malietoa le susuga Papalii Malietau ole atalii ole tasi o uso o Papalii Faamausili Moli.
Afai e iai se finagalo e ese ai o ia suli o Moli ole finagalo ole faamasinoga sa tatau ona auai ile feiloaiga a suli e toatolu sa faia i Sapapalii ia Iuni ole 2017. Sa tatau ona auai e momoli iai so latou finagalo a’o feiloai uma ai le aiga i ona suli uma e toatolu. Ua poloaiina ele faamasinoga le faia loa ose saofai e faatino ai le faanofo Tupu ole suafa Malietoa.
Oloo laumanu’ia ni molimau mai nisi o suli ole suafa ua latou faaalia ai oloo iai se apili oloo tapena e faaulu faasaga ile faaiuga ua mae’a ona fofogaina. “Oute faafetai ile Atua ua aumai se tali ile gasegase o lo matou aiga ae ole a se’i feiloai foi suli o Moli e laolao ai so’u manatu e tusa ole taunuuga ole suesuega ale faamasinoga ua aumai”.
Ole finagalo lea ole susuga Papalii Faamausili Moli ma ua ia faafetaia ai foi le tapuaiga a aiga uma aemaise ole atunuu atoa.
