E tele ituaiga pia ma ‘ava malosi o loo faatauina i Ausetalia ae o le taimi muamua lenei o le a tofo ai i se pia e gaosi mai le fua o le laau o le ‘ulu (breadfruit) poo le ‘maualuga’ ua gaosia nei i Samoa.
O le Aso Gafua, 23 Mati 2014 ma le Aso Lua 24 Mati 2014 o le a faatauina ai lenei oloa mai Samoa faatasi ai ma le tele o isi oloa Samoa i Sini nei. O lenei oloa o se pia a le ‘Vailima’ e faaaogāina ai le ‘ulu. E fou i le maketi ma o le a iloga foi le tuufesili o tagata pe faapefea le tofo ae pe fia foi ni fagu ma ni ipu maua ai lagona o pia masani. I nei atunuu ua iai pia e gaosi mai apu, fala ma isi fualaau ‘aina ae o le taimi muamua lenei o le a tofo ai le (Vailima-Ulu).
O le taimi nei o loo faaupuina i ana faatosina ma faasalalauga le mau tauavae o le ‘From the Tree to the Bottle’. O le vaitau 1978 na tatalaina aloaia ai le fale gaosi ‘ava malosi a Samoa i Sisifo i Vaitele ma o le avanoa muamua lenei o le a faalauaitele ai lenei oloa fou aemaise isi pia fou e pei o le Sama ma le Taula i tagata Samoa i Sini nei faapea Ausetalia.
O se igoa ua loa foi lana tautua i le lagolagoina o soo se faamoemoe i Samoa e pei o taaloga ma mafutaga eseese e oo lava i autaaalo a le atunuu. O le 1994 a o avea ma lagolago autu o le Manu Samoa na manumalo mataina ai i le aufili Malosi a Aukilani i Eden Park i ‘ai e 15-13.
O lea taaloga o le Supa 10 i lea vaitau na iloa ai e atunuu o Niu Sila, Ausetalia ma Aferika i Saute le matautia o le Manu Samoa ma tineia ai loa le Supa 10 ae see i le Supa XV e aunoa ma Samoa.
O le faaaliga lenei o oloa i le masina o Mati 2014 o le a tofo ai Ausetalia i lenei pia fou mai Samoa le atunuu o le aulakapi malosi i tele o tausaga talu ai.
