Sauni Sini e faaofo le Lakapi Fitu

Pama Fou, le alo o Samoa i le taitoafitu a Ausetalia
Pama Fou, le alo o Samoa i le taitoafitu a Ausetalia

Ua toe nei o se aga lolofi mai atunuu e sefuluono mo le taitoafitu faavaomalo e faia mai i Sini i le aso 6-7 o Fepuari 2016 lea sa maimoa mai televise i le mataina o lana faafeiloaiga o le tausaga fou ma le 2016 i lana faaaliga faapapa felanulanuai i le vaeluaga.

Ua amata foi le alumia o faletalimalo ma nofoaga api e taunuu mai ai malo asiasi mai e tapuai a latou aulakapi.

E aofia i le sefuluono lenei le Manu Samoa lea sa misi lona avanoa muamua mo Rio i taaloga o le Olimipeka i le tauvaga a le Oceania na faia i Aukilani. O le malae Allianz Stadium lea e faamautu ai le Roosters, o le a faia ai lenei tauvaga ma e lalata tonu i le ogatotonu o le taulaga mo tagata asiasi mai.

O le nofoaga foi lea e iai le ofisa tutotonu o le NRL faapea lana fale mataaga (museum) e asia ma maimoa e malo fai mai.

O se tasi o sui iloga o le NRL lea ua taliu atu i le Iuni, o Sonny Bill Williams e lē gata o le tele o ata ma faamatalaga i le museum lenei ae o le a vaai foi mo le taimi muamua e taalo mo le taitoafitu a Niu Sila auā le faamoemoe mo Rio ma o se itu lelei mo le kapeteni ia DJ Forbes e faaopoopo i le malosi o loo iai lana laina i luma.

O se vaalele a le ‘au a Ausetalia ia Pama Fou o le a vaaia fo i lenei tauvaga ma atonu o le faia mai i Sini o le a siitia ai lana ‘au e suipi ae lei faagasolo atu i Amerika le tauvaga. Mo le Manu Samoa o se avanoa e toe fetuunai ai fuafuaga a le faiaoga ia Damian McGrath ma le pulega ia suia se laasaga e toe saili ai nisi gaioiga ia lelei.

O le vaaia foi o le toatele o Samoa i Sini nei mo le taimi muamua atonu e fesoasoani tele mo le Manu o tau toe apata mai.