Sauni Siaki Apelu e toe tauva, Asia-Pacific mo Samoa

Bodybuilding Championships

E ui ina ua onosefulu tausaga le matua o le susuga ia Leauma Aualiitia Siaki Apelu, peitai e le o taofia ai le naunau e saga faaiila pea le taleni ma le taaloga ua fiafia i ai.

O Siaki Apelu, le suafa e pei ona lausilafia ai lenei foi tamafanau a le atunuu, i le taaloga o le Teuteutino (bodybuilding).

O se tamalii o loo alala i Niu Sila, peitai o loo fiafia pea e faaaoga lana taleni e ta‘u ai lona lava atunuu o Samoa. Ua suafa matai ia Leauma i Vaiusu i Faleata, faapea le suafa Aualiitia i Lefaga.

Ua toe sauni atu nei e toe tauva i le isi foi tausinioga i le taaloga o le Teuteutino (bodybuilding) i le tauvaga faavaomalo, a le International Asia-Pacific & Auckland Bodybuilding Championships.

Sa ia maua le Pine Auro i le tauvaga lava lenei i le tausaga e 2010, sa faia i Rarotonga. Sa masii i lea tauvaga o ia o se sui tauva mo o Niu Sila, peitai o se feeseeseaiga sa tulai i lea vaitaimi, sa toe liliu ai ma tauva mo le igoa o Samoa, mulimuli ane sa ia manumalo ai i le Pine Auro.

O le tauvaga o le tausaga nei 2012, o le a faataunuuina i Aukilani i le itu i Sisifo i le Aso Toonai, aso lima o Me.

O le vaega o le onosefulu tausaga agai luga (60 yrs plus), poo le Master of 60, o le a tauva ai le susuga ia Apelu.

Ua sefuluvalu tausaga o ia faia pea ma auai i tauvaga faalotoifale i Niu Sila, faapea tauvaga tuufaatasi a le lalolagi (National & International Championships). Ua faafitusefulu ona auai i tausinioga i lona aofaiga, i totonu o le sefuluvalu tausaga e pei ona ta‘ua. E fasefulu tauvaga faavaomalo, ma le tolu sefulu faalotoifale a Niu Sila lava latou ia.

Ae o le tautinoga a lenei tamalii o le atunuu, o le fitu sefulu ona auai i tauvaga eseese, o le fitu sefulu foi lea o ana faailoga, mai le numera tasi, e oo i le numera tolu.

O lona uiga e lei oo atu lava i le tulaga fa agai i lalo, se tulaga o lona taumafai talu ona amata auai i le foi taaloga.

E tulaga ese lenei tausaga i le faamoemoe o Apelu, ona o le Aso Lua, aso muamua o Me, e atoa i ai le onosefulu tausaga o lona soifua, a o le Aso Toonai, aso lima lava o Me 2012, o le a toe tauva ai i le isi foi sailiga siamupini a le International Asia-Pacific & Auckland Bodybuilding Chapioships.

O sona lea fiafiaga ona o loo maua pea le malosi e ui i le matua ua oo i ai lona soifua, peitai o loo augofie pea e faaauau le taleni ma le meaalofa ua fiafia i ai. O le hall a le Kolisi i Glenfield i North Shore, ua fuafua e faia ai lea tauvaga faavaomalo.

E amata i le tasi i le aoauli ona faagasolo le polokalame e pei ona faatulagaina, ae o le ono i le afiafi, ua fuafua e amata ai Finals, ma faagasolo atu ai lava seia maua i latou o le a faamanuaiina i siamupini ma tulaga aupito ane i ai.