O le Aso Toonai o le a fai ai le National Trials a le Samoa Triathlon. O le taimi muamua lea o le a fai ai tuuga faaleatunuu a le Samoa Triathlon Federation. O le tulafono autu lea a le asosi Triathlon a le Pasefika, poo le Oceania Triathlon Federation, ile faia lea o National Trials a Asosi taitasi.
O Raea Khan, ose alo o le atunuu ua leva ona nofo aumau i Sini Ausetalia faatasi ai ma lona aiga o Holly Khan. O lona tina o Tagaloa Penina Puni Khan o Fasitoo.
O Raea ma Holly ua saili nei ei laua se avanoa e taaalo ai faapolofesa ile taaloga o le Triathlon. Mo le taimi nei, ua na‘o Holly ua ausia lea tulaga o le taalo faapolofesa i totonu o Ausetalia.
O lenei la taumafaiga ua mananao ai laua e avea ma sui o le Asosi Triathlon i Samoa, e tauva ai i atunuu i fafo ile taaloga i lalo o le fu‘a a Samoa. O le a amata lea ile National Trials a Samoa e faia ile Aso Toonai nei.
O lenei taamilosaga o le a auai atoa ma i latou uma i totonu o le atunuu ua auai i lenei taaloga, talu ona faatū ile tausaga 2012. E pei o le masani ai, o le taaloga o le triathlon, e muamua le aau, sosoo ai ma le tietie uila ae faauma ile tamoe. O le mamao la o le taaloga lenei e 1.5 kilomita le aau, 40 kilomita le tietie uila, ae 10 kilomita le tamoe. O le mamao lea o taaloga faa-Olimipeka poo le Olympic Distance.
Mo le National Trials, o le a faia lea ile Penisula i Mulinuu, i Apia lava. E iai foi ma taamilosaga a le fanau laiti, lea e ta‘ua o le Tamatoa Triathlon, mai le 8 tausaga ile 13 tausaga. O le aau o le a faia lava i gataifale o Mulinuu, ma le tietie uila e 12 taamilosaga o le Penisula, a‘o le tamoe e 10 kilomita, poo le faatolu taamilosaga o le Penisula.
O nisi o le a tauva ile National Trials e iai Samasoni Nimarota o Leusoalii, Darren Young o Alafua, Shane Taivai Paulo o Fagalii, ma sui mai le afioaga o Saoluafata.
E toatele foi isi o le a tauva i ‘au, poo le toatolu o tagata, e tofu lava ma le taaloga e fai poo le aau, uila poo le tamoe. A‘o le vaega lea e fai toatasi e iai Raea ma Holly, ua na o latou e ausia le tulaga o le faatulagaina lea o tagata tausinio o Samoa i lenei taaloga (National Rankings).
Oloo loma taaloga faavaomalo o le a tauva ai sui o le Triathlon, e iai le Pacific Games i Tonga ile tausaga 2017 ma le Commonwealth Games i Ausetalia ile tausaga 2018. O i latou la o le a faamanuiaina i lenei ta’aloga, o le a gasolo atu loa e tapena mo ia taaloga faavaomalo.
Afai e sao se sui o Samoa i taaloga ia, o le a avea lea ma tulaga e fesoasoani ile atinaeina o le taaloga i totonu o Samoa. E lē ose taimi muamua foi lenei o le a tauva ai Samoa ile Triathlon i taaloga ia, auā na iai sui o Samoa i taaloga o le Pasefika lea na fai lava i Samoa. O le sui o Samoa mai lea taimi ma taaloga, o le susuga ia Reupena Pogi, lea ua fai ma fautua lagolago a le Samoa Triathlon Federation ile taimi nei.
A mae‘a le National Trials, ona sosoo ai lea ma le Warrior Race a Samoa e faia i Lalomanu. E fai lava si mamao o tuuga o le Warrior Race a Samoa, ile 2 kilomita o le aau, 90 kilomita o le tietie uila ma le 21 kilomita o le tamoe.
Oloo iai le Asosi a Samoa ile lio o Asosi Triathlon ale lalolagi, o le a faapea ona auai atu ai Samoa ile fono a le International Triathlon Union (ITU) o le a faia i Sepania ile masina o Tesema ile tausaga nei.
