Sauni Pouniu mo le tofi o Satupaitea

O se tasi o tamā o le atunuu ua leva ma ua loa lana tautua i le tele o vaega o le soifuaga o tagata Samoa, i le va i fafo ma fale i Aukilani ma Niu Sila, peitai ua sauni nei e lu‘iina le nofoa o lona itumalo i le motu i Salafai, e ala i le faiga palota tele a le atunuu i le tausaga fou.

Faleao Pouniu Faumuina Faamoetauloa Ulaitino Tauasa Tai Mase Lautoa Evile Lavea Mataia II

O lona tamā poo lona tuaa, o le fetalaiga ia Lavea Evile mai le afioaga o Safotu i Salafai. O se tasi foi o tamā e logologoā ma tautaua i le lauga faa-Samoa moni lava ia, ma le faaaogāina foi o le aganuu ma le gagana.

O lona tina o Oloa Faleao Tikeri mai Satupaitea, ma o le itumalo tonu lea o loo ua fuafua Pouniu ma ua faamoemoe e tauva ai mo le faiga palota tele a le atunuu i le tausaga fou 2011.

O se tasi vaega o lona tupuaga, e afua mai i le afioaga o Samatau, le paia i le Falefa o Usoalii ma le Gafa, Fiame ma le Tamaitai, faapea le saofaiga ia Leulumoega ma le mamalu i le Faleiva.

O se tasi lenei o failauga tautaua tele foi i le tulaga o le aganuu ma lona faaaogāina i le va i fafo ma fale, aemaise lava o fesagaiga o aiga, paolo ma gafa maualuluga i aso o maliu, faaipoipoga, taligamalo, fesagaiga aulotu ma faafeagaiga, ma isi lava faamoemoe tetele faaleatunuu e masani ai i Aukilani ma Niu Sila.

E lauiloa lenei failauga ona o le poto i le aganuu, ma le faaaogāina o le gagana Samoa, ae silisili foi ona lauiloa i ona uiga mālie ma le tausaafia e ufiufi ai ona uiga paaaa ma le matautia i le tele o taimi. Peitai o lona lea soifuaga ma ana meaalofa ua faaaogāina ai ma tautua ai e lē gata i le atunuu, a o le Atua foi ma lana galuega.

O se tagata foi e atoa i ai ma taunuu i ai muagagana, o agaga a le atunuu, aemaise foi o alagaupu. E iai muagagana e faapea, A lē pepelo le failauga e lē manaia sana lauga. Ae a lē mālie foi le failauga e lē fia faalogologo i ai se isi i lana lauga. E fua foi le lauga a le failauga i foliga o le aso ma ana faiga.

E silia ma le 20 tausaga o alaala ma papaaao Pouniu (o lona suafa lea e lauiloa tele ai) i Niu Sila. O tausaga foi ia sa auauna ai ma tautua pea mo tagata o lona atunuu i soo se vaega lava e auai ai. O se tagata finau tele mo le lauga a le atunuu i aso faapitoa ma feiloaiga.

E tusa ai ma lana molimau sa ia ta‘ua ai o ia o se tagata e fiafia tele e mulimuli ma faalogologo i saunoaga ma fetalaiga a tamā matutua o le atunuu.

O lona lea malosiaga ma lona silafia o le aganuu ma lona faaaogāina, ona sa nofotuavae i le aumatutua i taimi uma ma le tele o lona soifuaga i Samoa, ae faapea foi ina ua taunuu ma nofo ai i Niu Sila mo le tele o tausaga.

O lona avanoa ua maua e taumafai ai mo le nofoa o lona itumalo mo le Palemene o Samoa, o se avanoa faaauro ma sa ia ta‘ua foi le agaga faafetai tele i lona itumalo, ona o le amanaia ma le lagolagoina o lona sui ma lona manaoga e pei ona lupe nei.

O lona toe foi i Samoa ma nofo ai mo se vaitaimi ua tuanai, ua foliga mai ai ma ua ia talitonu o lona lea taimi e faaauau ai lona soifua auauna e lē gata mo lona nuu ma le itumalo, ae faapea foi lona atunuu e pele i lona agaga ma lona soifua.

Tiute ma galuega sa tautua ai mo tagata lautele

E 20 tausaga o avea pea ma sui taitaifono o le Fono Faufautua a Samoa i Aukilani. Na amata mai i le tausaga e 1976 ina ua taunuu mai i Niu Sila, ma e oo mai lava ina ua toe taliu i Samoa e alaala ma faamautu ai, sa ia auauna pea i lea tofiga.

Ua leva foi ona tautua ma auai o se sui faavae o le mafutaga a tamā ma tina matutua, Le Tuaa Sinasina. Sa avea foi o se failauga sooupu i le komiti ma le Mau a le Sitiseni, sa taitaia e le afioga i le Tauaana, Anae Arthur Anae.

O ia foi o se sui faavae o le polokalame o le Aganuu i lona amataina i luga o le Radio Samoa, atoa ai ma le isi vaega o alagaupu faa-Samoa a le Radio Samoa lava. E lei mamao atu foi sa ia toe taliu mai ai ma toe auai foi i le toe amataina ma le toe faafouina o le polokalame o le aganuu, Aoao Mālu Manogi o le Lolo, e oo mai lava i lenei taimi a le Radio Samoa.

E lei faatasi foi ona avea ma sui tauva mo galuega Faufautua ma Community Board a le pulega faaitumalo a Manukau i le tele o tausaga ua mavae.

Ekalesia ma le Lotu

Ua leva ona tautua ma auauna i le ekalesia Katoliko i Otahuhu mo le tele o tausaga. O ia foi o se tagata tautua lotu, ma e fiafia tele foi i le gagana faakerisiano ma le fesootaiga ma le aganuu a Samoa. O le toe taliu ai i Samoa, a o loo faatumauina pea lea agaga ma le masani o le tautua lotu, ma le solisolimulivae i auauna a le Atua ma lana galuega.

O le iai i Aukilani o le tofa i le sui faaolioli mo le faiga palota a Samoa, ua sauni ai nei e feiloai ma lona itumalo faapea ona aiga e toatele i Aukilani ma Niu Sila. O lea foi faamoemoe ua iai le tofa ma le faautautaga, o le a saili ai ma sina seleni e fesoasoani mo le faagsologa o faiga ma le galuega mo le faiga palota.

E lē gata i lea ae ua tatalo foi i soo se tasi lava, o uo ma paaga ma aumea mamae ina ia auai ma faatasi ane e lagolago lona faamoemoe o le a faataunuuina i le aso 18 o Tesema, ma e amata i le 4 i le afiafi o lea lava aso.

O le faletafao o le Apia Way i Magele ua faamoemoe o le a faataunuuina ai lea feiloaiga a le sui tauva ma ona aiga ma le itumalo, aemaise ai o ana uo ma paaga masani.

O loo maualuga le talitonuga o Pouniu, o le a ia manumaloina le tofi o lona itumalo, peitai o lona lea talitonuga ae ua na o le Atua lava e silafia mafaufauga ma manatu o tagata ma le faiga o lana palota e pei ona ia saunoa i ai.

Ia manuia le faamoemoe