Sauni Peseta Vaifou e tali moliaga

Le afioga Peseta Vaifou Tevaga o le faipule o Faasaleleaga Numera 4
Le afioga Peseta Vaifou Tevaga o le faipule o Faasaleleaga Numera 4

Ua sauni le sui faipule o Faasaleleaga Numera 4 le afioga Peseta Vaifou Tevaga, e tali moliaga e lua a leoleo o le faia o ni gaioiga faaalatua na ia saini faamalosi ai se suafa o se faatonu o le kamupani nonu o le Local Partners i Vaitele, ma le moliaga o le aafia i ni faiga faaalatua ma le faamoemoe e faatino se solitulafono.

Sa talosaga le alii faipule e ala atu i lana loia le afioga Leulua‘ialii Olinda Woodroffe i le faamasinoga e soloia ma togi i fafo moliaga a leoleo.

O le autu o le talosaga, ona e leai ni molimau e lagolago ai moliaga a leoleo, ma le lē savalia ma tausisia e leoleo faiga masani faaletulafono i le faatinoga o a latou galuega e fesootai ma le faia o moliaga o le alii faipule.

Na iloilo e le faamasinoga le talosaga ma tuuina atu ai e le loia a Peseta se finauga malosi e faavae ni mau e lagolago ai le talosaga. Peitai na finau atu loia a leoleo o loo lava molimau e lagolago ai moliaga ma sa uia foi e leoleo auala uma o le faia o a latou suesuega seia oo ina taunuu i le faaiuga e molia le alii faipule.

O le teena ai e le faamasinoga o le talosaga ua faatulaga ai o le a valaau molimau a leoleo e lagolago ai moliaga, ae o le a avatu foi molimau a Peseta e lagolago ai lona teena o moliaga. O le mataupu ua molia ai le alii faipule e mafua mai i le liliuina ia te ia o sea o lona atalii i le kamupani nonu o le Local Partners i Vaitele.

Ua tuua‘ia e nisi o faatonu o le kamupani le alii faipule i lona sainia o ni pepa o se iugafono a le kamupani ma ave i le matagaluega o leipa ma faailoa i ai ua iai le maliega o faatonu e tuuina atu ia te ia sea poo shares o lona atalii. Peitai o loo teena e se tasi o faatonu sa ia sainia se iugafono faapea le mafuaaga lea o tuua‘iga i le afioga Peseta.

O loo sauni lenei tamalii i le palota mo le toe finauina o le tofi faipule o Faasaleleaga Numera 4 o loo ia umia.

O atugaluga ia o Peseta ona o le mataupu lenei ua pona‘ia ai lona faamoemoe i le silasila mai a le itumalo ma le atunuu.

O se tasi foi lea o vaega sa finau ai lana loia e soloia ma faalēaoga moliaga. E lei faamautuina se aso e valaau ai moliaga mo le tuuina atu o se tali aloaia a Peseta i moliaga. A mae‘a lea valaauga ona faataoto ai lea e le faamasinoga o se aso e suesueina ai molimau.

O le afioga Peseta Vaifou Tevaga o loo umia le tofi minisita lagolago o le Matagaluega a le Palemia ma le Kapeneta.