E lē o talia gofie e le toatele o mātua Pasefika le faaiuga a le Malo ua iai nei, ina ia taofia le toe faatupeina o le lolomia o tusi o loo tele ina faaaogā e aoga laiti mo le a‘oa‘oina o le gagana a le Pasefika.
E pei ona maimoaina i luga o le televise tasi TVOne News i le afiafi o le Aso Sa, ua faailoa ai le fuafua o se tasi o nisi o mātua o le a faaoo atu lava lenei mataupu i le Faamasinoga, lea o le a latou molia ai le Malo, i le solia o aiā tatau a le fanau.
Na faatalanoa i le polokalame a le tamaitai o loo nafa ma mataupu tau Atumotu o le Pasefika, Barbara Drevear, nisi o faiaoga mai aoga o loo aoaoina ai gagana a le Pasefika faatasi ma le gagana Peretania, faapea foi nisi o mātua. O loo tutusa o latou atugaluga e pei ona faaalia, o le momotu faafuasei lava e le Matagaluega o Aoga o lenei fesoasoani tele mo nai fanau aoga, e aunoa ma se fesootai lelei mai ma faamalamalama ni mafuaaga talafeagai o le latou faaiuga.
O le tele o finagalo faaalia e aliali mai ai, o se gaioiga faailogalanu lenei mea, ma e lē o talia gofie e i latou, lea ua galulue faatasi ai nei mātua, o faalapotopotoga a le Pasefika, faapea foi ma le lagolago a taitai o ekalesia, e finauina lenei mataupu i le Faamasinoga.
