“O a tatou galuega fai, e fai ile atoatoa, e faia ma le agaga o le feavata‘i ma ia maualuga lo outou faaaloalo,”..Minisita
“Malu o le Malo o outou e malu ai tagatānuu o Samoa. O upu na, ia aua ne‘i galo. E lē avea le leoleo e tou te soona fai ai ni faaiuga lē tatau. Ia fai ni faaiuga ma le talitonuga e malu ai le atunuu lenei. E tofu i tatou ma vaivaiga, ae ia avea ma luitau ma faatonu mo i tatou uma”.
O se vaega lea o le finagalo o le afioga ile Minisita o le Matagaluega o Leoleo, Tineimu, Tagata Tafafao, ma le Ofisa o Tausi Mavaega, le afioga Sala Fata Lisati Pinati, ina ua saunoa ile tulai faaaloalo a le vasega o Malu o le Malo ma le vasega o alii ofisa o le pulega o le Tineimu ma galuega laveai i taimi o faalavelave faafuasei, e faafeiloai ai lona toe filifilia e avea ma Minisita o ia Matagaluega e lua.
O le lima tausaga ua mavae sa uluai filifilia ai Sala e avea ma Minisita o Leoleo, Falepuipui ma le Tineimu. Peitai o lona toe filifilia ile tofi faipule o le Palemene, ua toe filifilia ai e tauaveina pea le vaaiga o ia matagaluega, ae ua aveesea le pulega o falepuipui ae ua faaopoopo iai le vaaia o le pulega o tagata tafafao mai fafo ma le ofisa o tausi mavaega.
“O le agaga lena e avatu ai le feau a le Malo. Fai mai foi le isi upu e tutusa lava le aso e tasi ma aso e afe i lau tautua.” O le galuega ose galuega e fita. E lē faigofie foi le galuega oloo faatino e tou taitai. Tautuana ma outou na e fou mai ia tou mulimulitai i galuega oloo faia e i latou matutua ma ua sinia ile galuega”. O le saunoaga lava lea a le Minisita na ia faailoa ai foi le talia e le Kapeneta o le siitaga fou o totogi mo leoleo uma.
E lei faailoaina ele afioga ile minisita pe fia pasene o le a sii ai totogi o Malu o le Malo, ae sa ia faamanatu ile mamalu o le aufaigaluega atoa, o le taui e alagatatau ae ia faia le galuega ma le faamaoni.
O le saunoaga foi lea ale Komesina o le Matagaluega na tomua ai le feiloaiga e pei ona faaalia ele afioga Fuiavailili Egon Keil, ua manaomia ni taitai totoa ma ni taitai faamaoni ma galulue punouai e faia le galuega e tusa o le tulafono, ina ia mafai ona malu le tulafono ale Malo.
Ile siitaga o totogi o le a maua ise taimi o le tausaga faaletupe fou ua faagasolo nei, ua faaalia ese ofisa sinia o le matagaluega, o le a fua le siitaga i tulaga maualuluga ua ausia e leoleo ile latou tautua.
“O le 95 pasene o leoleo o le a maua le faamanuiaga ae se‘i vaganā se lima pasene o leoleo ia ua ausia le totogi maualuga poo le maximum rate, o le a lē aafia ile siitaga”. O se faamatalaga lea mai le ofisa sinia na fesiligia.
O le faaaogāina o meatotino a le Malo, o le tasi lea o vaega na faamanatu ele Komesina o Leoleo i Malu o le Malo, ina ia faaaogā tatau ma le faautauta ae lē o le faatautala ma sailia ai ni faamanuiaga o le tagata lava ia.
Na ia faamamafa foi o le faamaoni ma le faia o le amiotonu ile faatinoga o tiute e mafai ai foi ona faatasina soo se leoleo, peafai oloo faatino ai le manaoga o le tautoga o le loto faamaoni ile galuega.
Na faaiu le sauniga ile savali faaaloalo a vaega taitasi o le Matagaluega o leoleo ma le Tineimu, lea sa vaaia ai le mataalia o alii ma tamaitai o le Malu o le Malo ile latou faa‘alo o le faaaloalo lea faamiliteli e lē gata ina faia e leoleo, ae faapea foi i vaega militeli o le fitafita a isi atunuu e iai a latou vaega‘au, ae o Samoa e leai ni fitafita ua na‘o leoleo oloo faamalosia le tulafono ma vaaia le malupuipuia o le Malo ma le atunuu atoa.
