Sauni leoleo e molia pisinisi laiti o loo feoai solo i le taulaga

O le masina atoa o Iuni na tuu avanoa ai leoleo i pisinisi laiti o loo faia solo i vaega eseese o le taulaga o Apia, ae o le masina fou o Iulai o le a muta ai lea avanoa ma amata loa ona agai leoleo e taofia ma molia tagata o loo faia ia pisinisi laiti.

Ua faailoa e le sooupu o le Matagaluega o leoleo le susuga Su‘a Muliaga Tiumalu, e lē o soona televave leoleo i le faatinoina o le malosi o le tulafono o loo latou faamalosia ae ua tuu avanoa, peitai o loo molimauina pea e lē o iai se agaga lagolago o tagata o faia ia pisinisi laiti.

“O le masina fou e faia ai le galuega ma e pei lava ona saunoa le Palemia, ua uma ona fausia le maketi e tatau ona agai loa i ai i latou nei”. O le finagalo lea o Su‘a ma lona agaga naunau e lē tatau ona aafia se isi i le solia o le tulafono o le faia o pisinisi laiti i vaega eseese o le taulaga e aunoa ma se pemita e faataga ai.

E limasefulu tala le totogi o le pemita mo ia pisinisi peitai ua faamanino mai foi e le sooupu e na o oloa o loo gaosia lava i Samoa e mafai ona ave i ai se pemita, ae e lē faatagaina i lea pemita ona faatau ai ni oloa mai fafo e pei o apa inu, ma pepa o meaai e pei o twisties ma isi oloa faapea o loo gaosia i fafo ma faaulufale mai ai i le atunuu.

O le mataupu lenei sa faaalia i ai se finagalo o le Palemia susuga Tuilaepa Lupesoliai Sailele Malielegaoi, i nai vaiaso e lei mamao atu ona o le faapea mai o se finagalo o nisi o tagata o loo faia ia pisinisi, o loo faataga atu i latou e Tuilaepa.

Na faaalia e le Palemia o lona alofa sa faataga ai ona o le taimi lea o loo fau le maketi i Fugalei a o lea la ua mae‘a e tatau ona agai i ai ia pisinisi e saili ni avanoa e faia ai i le maketi.

O le finagalo foi lea o le Palemia na ia tautino ai lona sese i le faataga o nei pisinisi ma ia saunoa ai o le mea foi lenei o le alofa e lē lelei.

O loo vaaia i le nofoaga faatali pasi i tua ane o le maketi i Savalalo le toatele o tagata fai pisinisi laiti o loo faagaioia ai, lea e tu loa se pasi savavali atu nisi ma pusa o loo fafao ai apa inu ma faguvai, ae faaopoopo i ai ma ni meaai.

Fai mai se isi o ulugalii malaga tafafao mai fafo, e lelei foi lea ituaiga o fai pisinisi e lē tau alu ai i se faleoloa, ae na o le savalivali solo lava ae muli auloa atu tagata nei ma tauanau le faatau o ni a latou oloa.

Se vaaiga masani lea ua vaaia nei i vaega eseese o le taulaga o le feoai solo ai o tagata ma faatau savali oloa tau taumafa ma isi oloa laiti. O loo faia foi lea tulaga i luma o faleoloa ma ofisa eseese i le taulaga