O le Aso Gafua 5 o Aokuso 2018, o le a tuua ai e le faafeagaiga susuga i le Toeaina ia Dr Vili Iosua, le faletua ia Folose ma le auamalaga, ona o le usugafono mo le Koneferenise tele a le Ekalesia Aoao a le Metotisi Fou a le Atua, e faatinoina lea i lona laumua i Samoa.
O le Koneferenise Tele lenei e usuia i le ta’i 2 tausaga, e ese mai i isi tauaofiaga e faia faasolo i atunuu uma o loo ua iai nei ona aulotu i isi vaega o le lalolagi.
E aofia ai Ausetalia, Niu Sila, Hawaii, Amerika ma Samoa.
O le fonotaga foi lenei, e talia aloaiaina ai nisi o aulotu fou ua faatoa faatutuina, ae faapea foi le faauuina ai o nisi o faifeau fou ma failauga fou o le talalelei, ae taualuga lava i le toe palotaina lea o se isi Taitaifono, se Failautusi ma se Teutupe mo le isi foi lua tausaga o le galuega.
I le usugafono la mai Sydney e toaiva i latou e aofia ai le Toeaina ia Dr Vili Iosua ma le faletua ia Folose Iosua, le susuga i le Fofoga o le Ekalesia ia Misa Faafeii ma Makerita Faafeii, susuga i le Failauga ia Misa Stan Viali Lesa ma le faletua ia Maima Faatoga Lesa, susuga i le Failauga ia Ta’uo Mailei ma le faletua ia Uanita Mailei ma le susuga ia Tumua Vili.
I se faamatalaga mai le susuga i le Toeaina na ia ta’ua ai e faapea; o loo iai foi nisi o lea usugafono o le a lautogia mo nisi o mataupu ma fono tatalo, latou te ta’ita’i ai i le taimi o le Koneferenisi.
O le a tuua e le usugafono Ausetalia i le Aso Gafua 5 o Aokuso ma toesea ai mai le aulotu mo le umi e lua vaiaso. I le toesea ai la o le Toeaina ma Failauga, ae o le a faaauauina lava sauniga lotu i Aso Sa e se tasi o Tamā matua o le aulotu ma le toatele o aiga lotu i la latou faamuli.
E momoli atu ai foi le agaga faafetai i le Toeaina ma le Foafoaga o le Ekalesisa, ona o le amanaiaina pea o le tautua a le Samoa Times, aemaise ai o le lipoti manino o lo latou faamoemoe.
Ae momoli atu ai faamanuiaga mai le Samoa Times ma le Sui i Sydney mo le usugafono. Ia tuli muliauloainba pea lo outou soifua i le alofa tau mulimuli o le Atua ma ia to pea manu mo le Koneferenisi ma ana mataupu.
