Sauni le Toa Samoa e laga lona toilalo ia Tonga – 2015

O le aso 2 Me 2015 o le a fetaui ai le Toa Samoa ma Tonga i le aai o Gold Coast lea o le a taumafai ai le au a le atunuu e laga lona toilalo mai le 2013 lea na manumalo ai Tonga i Penrith.
Ua faailoa mai foi e le NRL o le po lava lea o le a taaalo ai Fiti ma Papua Niu Kini i se taaloga faaopoopo.

Ua siitia lenei taaloga mai Penrith auā o le tausaga talu ai na vaaia ai le faatumulia o taaloga a le Toa Samoa i le Four Nations ma ua manatu ai le NRL o le a toe faaluaina i le malae a le CBUS Stadium i le Gold Coast.
O le Aso Faraile 1 Me 2015 o le a fetaui ai Niu Sila ma Ausetalia i le taaloga e tasi o lenei tausaga i le va o atunuu nei e lua e faamanatu ai le selau tausaga o le taua i Gallipoli i le aso faamanatu o le ANZAC.

Saunoa le faauluuluga o fefaatauaiga a le NRL ia Paul Kind o se vaiaso mataina auā o le a taaalo ai atunuu eseese e ono e aofia ai foi ma le taaloga a tamaitai i le aufili a Ausetalia ma Niu Sila, ma o le a avanoa ai uma foi tama taaalo o atunuu nei e ono o loo taaalo konekarate i le NRL e laei ai i lanu a o latou atunuu.
E lē gata o le tele o taaloga mataina i lea vaiaso ae o se avanoa mo tagata e tafafao ma maimoa ai i le matagofie o matafaga ma mataaga ua lauiloa ai le Gold Coast.

O se avanoa lenei o loo maua e i latou e toatele o loo masii atu i tausaga taitasi e maimoa le tauvaga lakapi taitoafitu a le IRB i tausaga uma o loo tauva ai foi le Manu Samoa.
O le tausaga 2018 o le a talimalo ai foi le Gold Coast i taaloga a Malo Taupulega lea foi e masani ona tauva ai au taaalo a Samoa.

Ua sauni nei le atunuu e talitali se aumalosi a le Toa Samoa e taumafai e laga le toilalo ia Tonga mai le 2013 mo le taaloga i le Gold Coast ia Me o le 2015.
Taaloga i le va o le Toa Samoa ma Ausetalia

Toa Samoa i le tauvaga o le Four Nations 2014