O le Aso Tofi o le vaiaso nei ua faamoemoe le South Seas Pictures, e faatauina atu ai i tua le Vaega 2 o lana ata tifaga o le Tua‘oi. O le vaega muamua o le ata tifaga lenei na faagata mai i le taimi na susunu ai le tunoa o le tina ia Lina ma si ana fanau, e afua lea ona o feeseeseaiga sa tulai mai i le tuaoi o le fanua o loo nonofo ai ma le fanua o se tasi o matai faiupu o le afioaga o Toeaso.
O le Vaega Lua o le Tua‘oi, o loo aumai ai nisi o faiga masani a nuu ma afioaga i Samoa e soalaupule ma fofo alamea ai mataupu faapenei, e aunoa ma le oo atu i le faamasinoga, peitai, e ui lava i taumafaiga a le afioaga e soalaupule le mataupu lenei, ae e lei mafai ai ona taotoga lelei, talu ai, e faasisi fua i le tuaoi, peitai e iai isi mafuaaga o loo lalafi mai tua, ua afua ai ona afaina Lina ma si ana fanau.
E tele ni vaaiga matautia aemaise o vaaiga faamomoiloto i le ata tifaga lenei e pei ona tagi talatala ai Vaega i lona tuafafine o Fofoa, ua fafano lima o le Atua ia te ia ona o lona lē usitai i lona tina aemaise o lona lē alofa i si ona tuafafine; o tuaoi sa lē tatau ona ia sosofaina.
E 1 le tiula ma le 38 minute le umi o lenei ata tifaga, ua mae‘a ona tuufaatasia ma ua faaaogāina foi metotia faaonapo nei e tapena ai, ina ia mautinoa e leai se ata e mamau pe faaletonu foi i le maimoa.
O le Tua‘oi Part Two sa pueina uma lea i Samoa, o loo faaautu i le alii o Toleafoa Faalifu Lauina, ua lausilafia e le atunuu i lana taleni o le faatinoina o ata tifaga, faapea le tamaitai o Laufa Tiatia, o Vaega Vaega, ma le tamaitai pese lauiloa o Emme To‘ala Eteru, o ia foi o loo ia lagiina se pese mālie o le a mafai ona maimoa i ai i totonu o lenei ata tifaga.
O le Aso Tofi o le a maua ai i le Samoa Video Center i Aukilani faapea le tele o isi faleoloa i totonu o Aukilani. O le Aso Toonai i le Flea Maketi i Porirua ma faatauina atu ai foi i faleoloa masani i Ueligitone faapea foi Kalaiesetete i le Aso Toonai lava.
O Ausetalia ua faamoemoe o le Aso Tofi ma le Aso Faraile o le a faatauina atu ai mai faleoloa masani le Tuaoi Part Two i pitonuu e iai Sini, Melepone ma Brisbane.
Manatua sau kopi, e tele lesona o loo molimoli atu e lenei ata tifaga, e lē gata o le va tapuia, ae o le va nonofo, ma le tausiga o tuaoi o le soifuaga nei.
Mo nisi faamatalaga faamolemole faafesootai mai le Samoa Video Center i Aukilani i le telefoni 09 276 4417, poo Tanupo Aukuso i le 0223078324 poo Faumuina Taufau Aukuso i le 02102716579, poo le imeli mai i le southseas@live.com.
