Sauni lē sa avea ma Minisita o leoleo ise faasalaga

Le fale faamasino i Mulinuu
Le fale faamasino i Mulinuu

O le faamaonia o le moliaga o le faaleaga o meatotino poo le intentional damage sa molia ai le tofa Ulu Vaomalo Ulu Kini, o lona atalii o Lancelot, ma se isi tagata o lona auaiga le susuga Faaolaina, ua nofo sauni ai e tuuina atu i luma o le faamasinoga ni lipoti mai le ofisa faanofo vaavaaia mo le faia ose faasalaga mo i latou e toatolu.

O isi tagata e toalua sa molia faatasi ua lē faamaonia le moliaga lava lea e tasi sa molia ai foi. O le tofa Ulu Kini e pei ona silafia sa tulai ile tofi faipule o Faleata i Sisifo mo se paeaiga a le Palemene ua tuanai. Sa avea ai ma Minisita o le Kapeneta mo le Matagaluega o Leoleo, Tineimu ma Falepuipui a‘o i lalo uma ia matagaluega ile vaaiga a le minisita e toatasi.

O le aso 26 o Setema o le tausaga e 2014 na lau ai le faaiuga a le faamasinoga o Fanua ma Suafa ma tuuina atu le pule o le fanua e 12 eka lona telē ile suafa Ulu i ona itu paepae e lua. O le fanua lea oloo nofoia e le susuga Maotaoalii Kaioneta Kitiona ma se tasi aiga o le au Gabriel ile pitonuu o Puipaa i Toamua.

O le aso 27 o Setema lava o le 2014 na avatu ai e le tofa Ulu Kini ma nisi se masini ma sua ai loa se vaega o le fanua lea na aveesea ai meatoto a Maotaoalii o fa‘i, esi, ma nisi laau faapea ma se pauaea. O le faaiuga a le faamasinoga o fanua ma suafa na tuuina atu le pule o le eleele ile suafa Ulu i ona itu paepae e lua, ae sa faapea se vaega o lea faaiuga, o tagata oloo nonofo ai i luga o le fanua ia nonofo ai pea ma fai le tautua ile suafa Ulu.

O le mafuaaga lea o le ave o le tagi a Maotaoalii ma se isi o aiga i leoleo ona o a latou meatoto ua faaleagaina. Sa ave ai foi e Maotaoalii ma le tau o ana meatoto i fa‘i ma uaea na faaleagaina.

O le faaiuga a le faamasinoga maualuga ua faamaonia ai le tau o ia meatoto ma uaea ma ua faaalia ai foi e le faaiuga, o le pule o le eleele e tumau lava lea ile suafa Ulu ae o le pule o meatoto na faaleagaina e iai lea ia i laua na tagi.

Ua faamaonia ai le moliaga o le faaleaga o meatotino ose solitulafono o lona faasalaga maualuga o le 14 tausaga ile falepuipui pe a faamaonia. Sa teena malosi e i latou ua molia le moliaga ma o lea tetee ua sao ai le isi toalua ma ua faaleaogaina o la moliaga, ae faamaonia le solitulafono ia i latou e toatolu ua sauni mo se faasalaga a le faamasinoga.