Sauni le Pasefika mo Atunuu uma o le Lalolagi – P2N

O le manulauti poo le anavatau a le Pacific 2 Nation o le “Toe faatulai ni toa, toe fafagu ni toa ina ia mafai ona faia le galuega pe faaauau le galuega faamisionare e lē gata i le Pasefika ae o atunuu uma o le lalolagi. “Pasefika mo Atunuu uma o le Lalolagi.”

O le po o le Aso Faraile talu ai 11 Setema, na faatumulia ai le Vodafone Events Centre i Manukau i sui o atunuu taitasi, ua lē gata i tagata Samoa, ae o isi atunuu e pei o Tonga, Initia, Māoli, Fiti ma isi atunuu o le lalolagi; o i latou ua faatāuaina le avanoa e galulue ma faafofoga ai i le Upu a le Atua aemaise o le tāua ma le aano moni o le Pacific 2 Nations e pei ona faatinoina i tausaga taitasi.

O le polokalame na tatala aloaia i aitema na saunia e le Ekalesia o le Life Church i Manurewa ma amata faagasolo ai loa le faamoemoe o le po.

Sa maitauina le toatele oi latou sa molimauina le tatala aloaiaina o le Pacific 2 Nations i lenei tausaga, aemaise ai o le fesuisuiai o le faalogologo i auauna a le Atua sa fai ma avefeau i le faaiuga o le vaiaso, e pei ona tulai ai le faafeagaiga mai Indonesia ia Paulus Wiratno ma Pastor Norm McLeod e folafola le Upu a le Atua i le uluai po o le Aso Faraile.

O le taeao o le Aso Toonai na toe faaauauina ai lenei polokalame ma na lauga ai le taitai aoao o le Assembly of God i Niu Sila le susuga i le faafeagaiga ia Iliafi Esera i le upu faauuina a le Atua faatasi ai ma le Purinisese o le malo o Tonga ia Mele Siu‘ilikutapu, ma o se avanoa lelei sa maua foi e tagata mai Tonga e auai ai e lagolago le tulai o le Purinisese i lana saunoaga, ae ua mafai ai foi ona masii atu ma le aufaipese ma le failipu. Tāua le molimau a lea foi auauna auā o se tagata ua ofoina le soifua mo le Atua, ma o loo iai foi nisi o mafutaga tatalo o loo taitai ai e lē gata i Tonga ae o le Pasefika atoa.

Ae o le saunoaga a le susuga i le faafeagaiga ia Tak Bhana i le po mulimuli o le polokalame na ia faatusaina ai le tāua o le mamao o lau falō i le ‘aū pe a memei, auā a laitiiti lau memei e latalata foi le mea e pa‘ū mai ai. Sa faatusaina i le mamao o le mea e te malaga ai e ala i se mea ua tuu atoa i ai lou loto ma lau galue faapea le ofoina o lou ola. E fua le telē o lau galuega i le telē o lau foai e te tuuina ai i totonu. O lona uiga e tatau ona tele lou taimi e tuuina i le Atua e galueaina ai e le Atua lou loto ina ia mamao le mea e tuuina ai oe e le Alii ma o le aano moni lea o le ‘aū.

Faatasi ai ma le saunoaga a le susuga i le faafeagaiga ia Lui Ponifasio i le faamalamalamaina o le talafaasolopito o le galuega, i le taimi na amata mai ai i Samoa, galuega i tagata Rarotonga, ma tagata Tahiti. Saunoa le faafeagaiga i le faaaogāina o tagata Pasefika i le amataina o le faatalaleleiina o Samoa, e lei amataina e Ioane Viliamu, ae na amata e tagata Samoa sa i Tonga ona o atu ai lea o tagata nei sa i Tonga ma avatu le lotu i Samoa le Metotisi i le tausaga e 1824 seia faasolo atu i le 1828.

O le lotu sa amata faatuina i Satupaitea ma Manono i ia tausaga, mulimuli ane faatoa taunuu atu ai lea o Misionare Uesiliana sosoo atu ai ma Ioane Viliamu i le tausaga 1830. O le autu lava o le faaaogāina o tagata Pasefika, lea e mafua mai ai le igoa o le Pacific 2 Nations poo tagata Pasefika mo Atunuu uma o le Lalolagi.

E maitauina i lenei tausaga le toatele o i latou ua ofoina o latou soifua ma fai a latou tautinoga e fia auai i le galuega Faamisonare, ma o le faatinoina o lenei galuega e tatau ona e auai i le aoaoga faa-Misiona i le 6 masina poo le 8 masina, auā e iai Misiona e tai 3 vaiaso tai masina faapea foi le 1 le tausaga ma le 2 tausaga, auā sa iai lava pepa sa faatumuina ai suafa ona mafai ai lava lea ona e auai i lenei faamoemoe, ona e lē mafai ona e malaga i se galuega faatala‘i ae e te lei auai i nei aoaoga.

O le tele foi o le suiga o lenei tausaga ua lē toe vaevaeina i ni semina e pei ona iai le tausaga ua tuanai, ae ua mafai ona tuufaatasi tagata mai atunuu eseese ae faaaogā ai failauga faapitoa e pei ona valaauina.