O lea ua sao mai i luga i ‘au e fā pito i luga se tasi nei o ‘au malosi ole taamilosaga ale Aukilani Samoa, le Nations mai le itu i Sisifo o Aukilani.
Ua loa foi tausaga o tautua lea ‘au i totonu ole Iuni Lakapi lenei, ma ose ‘au ua tele foi tausaga o latou umia le talita male siamupini ale Aukilani Samoa.
Ole Nations na tulaga muamua mai ile Pool B sa iai ina ua mae‘a le la taaloga male ‘au a Faleula ile vaiaso ua mavae lea na manumalo ai ile 58 ‘ai ile 8 a Faleula.
Ole taaloga lenei na naunau ai le Nations e manumalo ai ma ia maua ai foi se latou ponesi ina ia latou ausia ai le tulaga muamua ile latou Pool. E tasi le latou faia‘ina ile taamilosaga atoa lea na malolo ai ile ‘au malosi a Saleimoa, ae faapena foi ia Saleimoa e tasi le latou faia‘ina, faapea foi ile ‘au ale Moatoga e tasi foi le latou malolo.
E tolu ‘au ale Pool B na saili iai ni ‘au se lua e agai i luga ile faaiuga ole vaiaso ua mavae, lea sa toe taaalo ai le Moatoga ma Saleimoa ma manumalo ai Saleimoa ile 39 ‘ai ile 22 ale Moatoga.
Ma ua manino mai nei le Nations ma Saleimoa i ‘au e lua ole Pool B lea ua ofi atu i luga e finauina le semifinal faatasi ai ma ‘au e lua mai le Pool A le Apia Maroon male Marist Old Boys lea oloo latou umia le talita.
I taaloga ile vaiaso nei o lea ua sauni atu ai loa le Nations e faafetoai le Apia Maroon ile semifinal muamua ole Aukilani Samoa ile 1.30pm ile malae numera 1, ae o Saleimoa lea ua folifoli atu e faatoilalo le ‘au malosi ale Malisi ile semifinal lona lua ile 3pm ile malae Nu 1, ma ole lu‘i foi lea ile talita ile faaiuga ole vaiaso.
E tele ni matematega ale mamalu ole atunuu i taaloga ole faaiuga ole vaiaso i ‘au e ono sueina le siamupini, ona oloo peti nisi ia Malisi, ae oloo finau foi nisi ia Apia Maroon.
O nisi o tala i uaea mosooi faatoa iloa lava le sila ile fai pe a fetoai tino o tama, pe a faatusatusa ile malosi mai ole Nations ma Saleimoa lea foi e āloālo mālie mai lava o laua sā i luga.
