O fesootaiga televavave i luga o masini komipiuta e pei ole facebook ua avea nei ma fesootaiga ua le gata ina feiloai ai tagata o aiga o uo ma aumea mamae ae ua salalau ai manatu faaalia faapea tuua’iga maaleale ma le malolosi. E le tau faailoaina ile mamalu ole atunuu le fesootaiga ole Ole Palemia poo OLP ua suati mai ai i fafo faamatalaga malolosi ua tuua’ia ai tagata e pei ole Palemia ma le Malo.

Ua faaalia ele taitai ole Malo le afioga ile Palemia na aveese ele Malo le tulafono o tuua’iga taufaaleaga poo le criminal libel law e matala ai le saolotoga e faaali ai manatu ma lagona peitai o lea ua silasila nei le Malo ua avea lea ma auala ua masua mai ai i fafo lagona ma manatu i luga o auala o fesootaiga televavave ua afaina ai lagona o tagata. “Toeitiiti lava ona tutupu mai lea o nisi faaletonu e afaina ai le saogalemu o tagata ona o ia faiga, ma o lea ua ioe uma sui faipule ole matou vaega (HRPP) e toe aumai le tulafono lea e sulu iai tagata e mafatia i faasalalauga nei”.

Ole tasi lea o tulafono mo le silafia sa ilitata iai le galuega faatusitala ma faasalalau ona e avanoa ai ona molia i latou o galulue i lea tomai pe a ave se mataupu ile faamasinoga e tuua’ia ai ni lagona faaalia e manu’a ai lagona ose tasi poo nisi tagata. Ole faasalaga ose tasi e faamaonia i lalo o lea tulafono ole falepuipui mo le umi e ono masina.

E iai le talitonuga ole toe faaofi o lea tulafono ole a avatu ai ele Malo ma ni teuteuga e ono mamafa ai se faasalaga ile falepuipui ma se sala tupe. Na fesiligia nisi o loia sinia ile atunuu ini o la finagalo e tusa ai ole toe faaofi o lea tulafono.

Na mumusu uma loia e faailoa o la suafa ae e ogatasi o la finagalo ile faapea mai e le ose faaiuga e logo mālie le toe aumai i luga o lea tulafono ua uma ona soloia ele Palemene. Ole finagalo ole tasi o loia ose tulafono lenei mai le taimi o pulega ale Malo o Peretania i tausaga ua leva sa fasi ai le saolotoga o tagata e faaali ai o latou manatu ini mataupu taua ma anoa. E le o toe iai lea tulafono a Peretania ma isi Malo temokarasi.

Ole finagalo o Tuilaepa na pau lea ole tulafono e mafai ona molia ai tagata oloo faia nei faasalalauga taufaaleaga i luga o fesootaiga televavave. Peitai na faaalia ele tasi o loia na fesiligia e tatau ona silasila le Malo pe mafai ona aiaia ai ma se malosiaga e mafai ona aumai faapagota ai i Samoa se tagata o nofo ma alala i fafo nate faia ni faasalalauga e tuua’ia ai le taufaaleaga tagata.

“Pe afai o Amerika e nofo ai, e ao ona silafia ele Malo e leai se tatou feagaiga ma lena Malo tele e mafai ai ona aumai faapagota ni tagata i Samoa.”

E le o iloa poo afea ole a toe folasia ai i luma ole Palemene lea tulafono mo le toe pasiaina ma faaaogā loa.

Comments

comments