Ua faamautu mai e le Failautusi Aoao o le Ekalesia Faapotopotoga Kerisiano a Samoa, le Susuga Rev. Dr Iutisone Salevao, le amata nei o ni galuega auā le faavae ai o se televise ma se leitio a le ekalesia.
O se taumafaiga ua leva ona faatalatalanoa e le ekalesia ae e lei agai lava le ekalesia e faatino ona o le manatu ia mae‘ae‘a suesuega i le talafeagai o le faatu o se atina‘e faapenei aemaise o le fesoasoani ai i le fesootai atu o mataupu a le ekalesia i ona sui lotu i Samoa atoa.
O le tusa ma le fā tausaga talu ai na iai se finagalo o le ekalesia ina ia mafai ai ona faatalatalanoa le faatau o le TV Samoa poo le Samoa Broadcasting Corporation SBC – ma o iina na amata ai ona laga lenei manaoga.
Peitai e lei tulai mai lea faamoemoe ma na ta‘ua e le Failautusi o lea vaitaimi e lei lava se suesuega na faia, e lei lava foi se faamalosi ina ia taunuu lea ituaiga atina‘e ona e lei lava sauni lava le Ekalesia.
O lea ua mae’a ona talanoaina le faataatiaga o pou aua fesootaiga tau televise ma o le alii Pule o le Pro Com le Afioga Vaeolenofoafia Tapasu lea na ta’ua e le Susuga Rev. Dr Iutisone ua agai iai mo se fesoasoani i lea itu tau i galuega faa inisinia o televise.
“O le taimi lenei o le latou foi fesootaiga lenei ua aofia ai le lua vae tolu (2/3) o le atunuu ma o le a faaauau ona galulue ina ia mafai ona soo atoa Samoa i nei faasalalauga, o le galuega amata lava lea,” o se faaaliga lea a le susuga i le Failautusi.
O se saunoaga a le alii faifeau, o le pasia o lenei atina‘e faapea ai se leitio, na tuu atu muamua lava e le Ekalesia ina ia saili le ofisa mo se tupe e faatino ai lenei galuega.
O lea la ua maua le seleni e pei ona ta‘ua e le alii failautusi ma ua amata ai nei loa galuega.
“Ua iai le faamoemoe e oo atu i le fono tele o le tausaga fou ua amata sa‘o loa galuega faasalalau mai i le televise a le Ekalesia,” o se saunoaga lea a le alii failautusi.
Ua faapea foi ona tofia komiti i totonu o le ekalesia e feagai ma vaega eseese o le atina‘e lenei ona o le manatu o le ekalesia ia amata le galuega lenei ae ua atoatoa lo latou malamalama ma le iloa i le faafoega o ofisa faasalalau. “E tele le galuega ma o lea ua tuu mai le sefulu (10) masina ina ia matou o atu ai i le Fono Tele o le tausaga fou ma faapea atu ua sauni e amata loa faasalalauga”.
O le aufaigaluega, o masini e faatautaia ai galuega – o pou o faasalalauga atoa ai ma polokalame o le faagasolo i luga o le televise aemaise foi o le leitio, o galuega tetele nei ua feagai nei ma le ekalesia.
Ae o mo le taimi lenei o le faafetai a le susuga i le Failautusi o lea ua amata ae ua maualuga atu le finagalo e faatino loa ma ia atoatoa le sauniuniga faato‘ā agai ai loa e faatino lenei taumafaiga.
O le taimi lenei ua iai le televise a le Ekalesia Katoliko lea foi ua molimauina lava le agai pea i luma o ana tagata matamata.
O le Ekalesia Aso Fitu ua faapea foi ona iai lana lava televise e pei ona faatautaia ai ana foi polokalame ma sauniga lotu.
O le televise a le Nofoaga Tututotonu o Tapuaiga (Worship Centre) ua faapea foi ona mautu ma le Ekalesia a Iesu Keriso o le Au Paia o Aso e Gata ai lea ua sau sa‘o ana faasalalauga i le isi ona laumua i Hawaii, ua faapea ona ui mai i le ala ata o le TV 3. O sauniga lotu a le Faalapotopotoga o Ekalesia Soofaatasi o loo alu i aso uma ma Aso Sa taitasi i luga o le TV One i Mulinuu.
Faatau e le EFKS le nofoaga sa faamautu ai le Samoa Observer
Ua faapea foi ona faamautu mai ai e le Failautusi o le EFKS le faatauina e le ekalesia o le nofoaga lea sa faamautu ai le Samoa Observer mo le tele o tausaga o lona faavae mai. O le nofoaga lea e i autafa o le kamupani gaosi tapaa o le British Tobacco lea ua lē o toe iai le nusipepa ae ua see i le isi itu o Vaitele ua iai lana lomiga fou tele ua faatautaia mai ai ma ana galuega.
O le nofoaga tuai lea ua faatau e le EFKS ua aofia ai le fanua e tusa ma le kuata eka ma o loo iai se fale fogafalelua sa galulue ai tusitala ma le nofoaga e aofia ai se fale ma le masini e lolomi ai nusipepa.
O se atina‘e ua manatu le ekalesia e pei ona saunoa i ai le Failautusi e tāua tele i le agai i luma ma o lea na maua mai ai se tau e lē taumate ua talafeagai.
E $900,000 le tau atoa o le fanua ma meatotino o loo iai ma na amata feutagaiga i le $1.8 miliona tala ae o lea ua afa lelei le tupe ua faaitiitia ai lea uluai tauaofai.
O lea la ua amata foi fuafuaga o lea nofoaga auā le faatinoga ai o auaunaga a le ekalesia i le itu tau i lomiga. O le nofoaga lomitusi a le ekalesia lea e ta‘ua o le Malua Printing o loo faapea ona i Tamaligi i autafa o le Malosiaga tau Eletise i gauta o le Fogafaleono a le Ekalesia le Ioane Viliamu.
