Ua faafetai le alii leoleo taai lua oloo faamalolo lē tumau le susuga Hillary Eteuati ile galuega a lona loia le susuga Donald Kerslake, ua taunuu ai le faamasinoga ile faai’uga e soloia uma ona moliaga na faia e leoleo ile tausaga e 2016.

Ole tausaga lava lea e 2016 na valaau ai moliaga ole faalavelave i tiute o leoleo, lafo o upu tau faamata’u, ole faaoolima, ma le umia ose aupega matautia ae na tolo taualumaga o nei moliaga ma suesueina ele faamasinoga faaitumalo ile tausaga ua mavae ma faaleaoga ai. Peitai ole taimi na vavaō ai le matagaluega o leoleo i moliaga ole Komesina o leoleo na toe aliali mai ai i luma foliga o ia moliaga ma toe talosaga ai leoleo ile faamasinoga e toe faaulu moliaga uma faasaga ile susuga Hillary Eteuati.

Ole tasi lea o leoleo na ave le suafa e suesue ile komisi na suesueina tuua’iga ole solia o tiute faaleoleo lea na molia ai nisi o leoleo sinia sa lotolotoi ile suesuega o moliaga na molia ai le komesina o leoleo ma ole taunuuga o lea suesuega ole faamaonia o ia tuua’iga ma ua faamalolo tumau ai ia tamalii, ole tasi sa avea ose tasi o komesina lagolago.

E lei suesueina Hillary ile suesuega ale komisi ona ole taimi lea oloo iai moliaga a leoleo ile faamasinoga faaitumalo.

O foliga fiafia ole susuga Hillary Eteuati lona lua mai le itu taumatau, o lona tamā le tofa Agafili Patisela Eteuati o lona toalua ma se tasi o ona alo tamaitai. O lana loia na finauina ona moliaga ole susuga Donald Kerslake ile itu agavale

O foliga fiafia ole susuga Hillary Eteuati lona lua mai le itu taumatau, o lona tamā le tofa Agafili Patisela Eteuati o lona toalua ma se tasi o ona alo tamaitai. O lana loia na finauina ona moliaga ole susuga Donald Kerslake ile itu agavale

Ole amataga ole vaiaso nei na toe valaau ai le mataupu ma talia ai ele faamasinoga le tuualalo ale itu a leoleo ina ia toe faaui i tua le latou talosaga na faaulu ile faamasinoga mo le toe faia o moliaga ole alii leoleo taai lua lea ua faaleaoga uma ele faamasinoga.

O Hillary Eteuati na ia faaulu se tagi faasaga ile Komesina o leoleo le mafuaaga ole suesuega na taunuu ile faia o moliaga ole Komesina le afioga Fuiavailili Egon Keil, lea na toe faasolomuli uma i tua ia moliaga e se loia mai Niu Sila na tulai mo le itu a leoleo.

“Oute faafetai ile Atua ua aumai le mea moni auā sa ou tuu fesili pea pe aisea ua toe faia ai nei moliaga e leoleo, pe iai nisi o fafauina nisi gaioiga lē lelei ia te au”. Faaalia ele tamā o Hillary le tofa Agafili Patisela Eteuati, sa lē faalavelave lava ile galuega a leoleo ae tuu pea e saili le amiotonu ma o lea ua aumai le tali e manumalo le mea moni.

Ua tapena ele loia a Hillary se talosaga e fofogaina ile faamasinoga mo le totogi ole la finauga e totogi ele itu a leoleo, aemaise ia totogi ai foi ma se taui mo lē sa molia ona talu ona motusia lona totogi ina ua malolo lē tumau ua fausasaga tupe totogi o aitalafu i faletupe ma isi auaunaga tau pisinisi.

Faaalia ele tuaa poo le tamā ole alii leoleo le tofa Agafili Patisela Eteuati, sa onosai lava ma tapuaia le faamasinoga o lona atalii ma o lana faafetai ua iu e aunoa ma le eleelea ole suafa o lona alo ise solitulafono sa tuua’ia ai e leoleo. Oloo tuufesili Hillary ma lona aiga pe o iai se gaioiga o lafi mai tua o moliaga na faia e leoleo.