Na matuā faatumulia le mamalu o Samoa ma tagata Pasefika i le nofoaga a le Aoga Amata Leataata o Tupulaga i Aukilani i Sisifo, i le Aso Toonai na tea nei, aso 12 Aperila 2014, i le faalauiloaina o se finagalo o se tasi o tamalii Samoa, le afioga Lemalu Herman Retzlaff.
O Lemalu Herman, o se alii Loia, ma o lona finagalo e pei ona sa faalauiloaina faalauaitele, sa ia saunoa ai ua fia avea ma sui tauva mo le faiga palota tele a Niu Sila o le tausaga nei. O le vaega faaupufai a le Labour, o loo ua agai i ai le finagalo o le alii Loia, e fia tauva ai, mo le itumalo i Henderson i Aukilani i Sisifo.
O lona uiga o le a ia faafetauia le tamaitai o Paula Bennett, o loo avea ma Minisita o le Puna‘oa a Niu Sila (Social Development ), pe afai ae manuia i le filifiliga muamua e pei ona faataoto nei. O le afioga ia Lemalu, e toafā i ai sui o le Labour o loo agai i ai le filifiliga, mo se sui e toatasi o le a tamoe i le fu‘a a le vaega faaupufai mo lenei tausaga. O lona uiga afai ae manumalo mai Lemalu i le filifiliga o le toafā o loo iai nei, ona aloaia loa lea o le sui tauva mo le Labour i le faiga palota tele a Niu Sila 2014.
E lei maua e le Samoa Times, poo ai isi sui e toatolu o loo agai i ai le faiga filifiliga a tagata lautele o le itumalo.
Ae o se tasi o molimau faatuatuaina sa ia faailoa mai e faapea o Herman ua na o ia le tagata Pasefika mai le toafā o i latou o loo sauni e tauva mo le sui e toatasi e tatau ona manumalo mai, ma tapena ai loa mo le faiga palota tele.
O le susuga i le alii Loia, o loo alala ma papaaao i totonu lava o le itumalo mo tausaga e tele. O ia foi o se Loia sa telē sona sao ma lana fesoasoani i le tele o faamoemoe ma manaoga o tagata Samoa ma le Pasefika.
E lē gata i galuega mo tagata lautele, ae o ia foi o loo galue ma sa tatalaina se tasi o vaega fou sa faatūina e le faiga malo a le National, i totonu o le fale faamasino, poo le Matagaluega o Faamasinoga i Niu Sila, i lona lala i Manukau. E oo mai i le taimi nei, o loo galue ai pea i le falefaamasino i Manukau.
I isi o ona tiute ma galuega tauave o loo faatino ai lana auaunaga, o loo avea foi o ia i le taimi nei ma Peresetene o le Asosi a Loia a le Pasefika i Niu Sila. E lē gata i lea, ae iai foi ona tiute faapitoa o se Aoao i le ekalesia o loo auauna ma galue ai mo le Atua ma lona finagalo.
O loo ua taoto atu nei le faamoemoe o le alii Loia mo le filifiliga a tagata lautele o le itumalo, ma o le aso 28 o le masina nei lava o Aperila, o le a faalauiloa ai le faaiuga o lea filifiliga, ma faalauiloa ai foi poo ai o sui e toafā e aofia ai Lemalu, o le a manumalo i le avanoa e tasi e pei ona tau sailia nei.
O le mamalu o Samoa ma tagata Pasefika o loo alala i lea foi itu o Aukilani, o le tāua lea o le faalauiloa e pei ona sa faia i le Aso Toonai na tea nei, ina ia silafia ai se tasi o ana tamafanau, ua foufou atu lona sa, mo le palota a Niu Sila o le 2014.
O loo iai le talitonuga o le vaega faaupufai a le Labour, e telē se avanoa e mafai ona latou toe aveesea mai ai le nofoa o le itumalo, e pei ona saofai ai le sui o le National i le taimi nei. O le Aoga Amata a Leataata o Tupulaga, sa latou tutū malosi e lagolago le faamoemoe o le afioga ia Lemalu i le Aso Toonai na tea nei, ma sa faaaogāina ai foi lo latou nofoaga i lea faamoemoe. Sa auai foi nisi o faafeagaiga o ekalesia Samoa o le itumalo, ma le toatele o isi tagatānuu o le Pasefika.
Sa faapea foi ona tuuina atu i ai le lagolago a nisi o sui sa tauva i tausaga ua mavae, ma o loo ua sauni atu nei foi e toe lui nofoa o le Palemene mo lenei tausaga e pei o le alii Faipule o Te Atatu, faapea le tamaitai o Carmel Sepuloni, o loo ua sauni atu e tauva mo Kelesetone mo le vaega faaupufai lava a le Labour.
