Ua osi nei le mafutaga a le aulakapi mai le afioaga o Leone i Amerika Samoa ma le aulakapi a le afioaga o Fasitoouta ina ua mae‘a se taaloga a ‘au a nei afioaga i le faaiuga o le vaiaso na tea nei ma manumalo ai Leone i ‘ai e 15 i le 14 a Fasitoouta.
O le paia lava lea i le afio o Tuitele o le Faatui o le Motu, susū Fa‘ivae o le malu o le fale, susū tama matua ia Olo ma le ‘Oso ma vae o le tootoo, susū ai foi Avegalio ma Tuiteleleapaga, susū i laua Ma‘ava, Ilaoa ma Toomata, le fetalaiga maualuga ia Salave‘a ma le mamalu o le ‘ai talaluma o le Alataua.
O le taaloga lenei na mafua ona o le malaga mai o le ‘au a Leone e fia auai i le taamilosaga lakapi o le Teuila le King of Rugby, ae ua toe tolopo, ona ua toatele nisi o loo i totonu o le taamilosaga sa galulue uma i le taligamalo a o tauaofia le fono a atunuu laiti tauae o le lalolagi.
Faaalia e le taitai o le aulakapi a Leone le afioga Toomata Silimusa Solomona, na maeu le taliina o le latou aumalaga e le afioaga o Fasitoouta, aemaise o le ekalesia katoliko a le nuu lea na latou saunia se Ipu mo le latou taaloga ua muamua nei manumalo ai Leone.
Na usu faaaloalo le nuu ma faatino foi le latou laulau tasi. O le mafutaga ua osia nei o le a malaga aatu ai i Amerika Samoa le aulakapi a fasitoo uta e toe lui le Ipu ua umia e Leone ma o loo fuafua e faia lea taaloga ile taimi o le vaiaso o le Mosooi a Amerika Samoa ile masina fou o Oketopa.
“O la‘u lava tala i lau susuga e maeu le sagisagi mai o le pule mamalu a alii ma faipule o Fasitoouta i le matou taunuu atu. O i tonu ou te talitonu ai ile mamalu o pulega a matai a le afio’aga ona o le maopoopo o le latou faaloalo maualuga mo matou”
O le fingalo o le afioga Toomata Silimusa na manino ai lona faagaeetia i le tali a le afioaga o Fasitoaouta, aemaise o le aapa lava o le susuga ile fesoasoani ma le aulotu Katoliko ma saunia le Ipu e faia ai le taaloga lea ua osi ai ma le latou mafutaga mafanafana.
“O le a matou faatali mai ile taunuu atu o le au lakapi a le afio’aga ma o le a le faatamala foi le matou tapenaga aua o lea ua matou muamua manumalo ile ipu”. O le taimi foi o le Mosooi a Amerika Samoa o le a malaga ai nisi o au lakapi mai Samoa Tutoatasi ise taamilosaga lakapi o lea faamoemoe.
