Ua fuafua o le Aso Faraile, 29 Aukuso & Aso Toonai aso 30 Aukuso o le a faaalia ai i le Mangere Art Centre le Vaega tolu o lenei ata. Talu mai le tifaga talu ai e lata i le 600 i latou na maimoaina le vaega lona lua, ma ta‘ua e le susuga Vili Ieru, o lē o loo puleaina le pueina o lenei ata, na aumai ai lava ma se manaoga i nai tamā ma tina matutua pe mafai ona toe fai se tifaga faapena o le Part 3. Ua talia le talosaga ma ua toe sauni atu ai nei le Vision Pictures e tali atu i le manaoga.
O le Aso Faraile 29 Aukuso e amata i le 9.30am i le taeao le faaaliga muamua, ae o le 12.30pm i le aoauli e amata ai le isi faaaliga. O taimi lava foi na o le a faaali ai i le aso e sosoo ai, Aso Toonai, 30 Aukuso.
O le Aso Faraile o se aso e manaia i le tafafao ai o nai toeaiina ma loomatutua ma le au nofofale, ae atonu o le Aso Toonai mo le aufaigaluega ma isi e lei avanoa i le Aso Faraile. E lua itula le umi o le ata, ae na o le $10 le tau mo tagata matutua, $5 mo tamaiti, ae o le ta‘i 5 tausaga agai lalo e leai se totogi.
Saunoa le susuga Vili, o le a faatauina le DVD poo le vaiaso lona lua poo le lona tolu o le masina fou o Setema, e fuafua i le taimi e taunuu mai ai le ata mai Thailand o loo saunia mai ai.
E faatauina ia lava pepa ulufale i le faitotoa i aso uma ia e lua e faaali ai le ata, ae nate fautuaina lava le tatau ona vave oo atu pe ‘afa itula a o lei amataina le ata.
O lenei ata ua faatulaga i ni vaega se fā, ma o le Vaega 4 ma o le vaega mulimuli foi lea, o loo fuafua e faalauiloa mai i tua mo le kirisimasi.
E tulimataia nei aso e lua ua lē o toe mamao, o le a toe maimoa ai le atunuu i lenei foi ata Samoa, “Toe foi le Tama Savaii” ua sili ona tulituliloa e le aumaimoa, aemaise le molimauina o taumafaiga a alo ma tamafanau a Samoa ua iai tomai i nei foi taleni.
