Sauni Bronwen Burmester e aau i Savaii

Le tina o Bronwen Burmester ma lana fanau, o Cole ma Moss i le latou aso Samoa i Whangamata i le vaiaso ua tea nei
Le tina o Bronwen Burmester ma lana fanau, o Cole ma Moss i le latou aso Samoa i Whangamata i le vaiaso ua tea nei

O le vaiaso o le a sau nei, i le Aso Tofi 7 o Aperila, o le aso lea o le tuuga aau i Savaii. O lenei tuuga o loo faatautaia e Samoa Events, lea e faaulu ai a‘u nei, Afoa Seti.

E toalima i latou ua tuuaao i le palau, e tauva i lenei tuuga matautia. E toatolu tamaitai ae toalua tamaloloa. E tasi le ‘au mai Samoa e toatolu tagata aau.

A o loma le taaloga ofoofogia – e atili ai ona uu fofoga i tatou uma i le tina o Bronwen Burmester lea o le a aau i Savaii. E nofo i Whangamata. O se tamatai tino laititi. E 60 sefulu ona tausaga.

Na feiloai le tusitala ia Bronwen ma lona alii a o o‘u nofo i Faletalimalo i Lalomanu. O la‘u masani i nofoaga faapenei o le aau lea alu atu i i ma o. Pe itula ou te aau ai. I le mae‘a la o le koleniga i le tasi afiafi ae talanoa mai loa si vaega lea, faasino i le laua foi taumafaiga i lenei foi taaloga. Aemaise le laua fanau e iai le alii matua o Moss Burmester na aau i le Olimipeka mo Niu Sila.

Ina ua ou faasalalauina la le Aau i Savaii i se mea o le ogatotonu o le tausaga ua tea nei, o le tina lava lea na muamua sii i luga lona aao ma lesitala lona igoa mo le aau.

O le isi vaega o Kate Sinclair (37), Abby Armstrong (28), Phillip Ryan (25) ma Todd Pritchard (49).

O le aau i Savaii e 22.3 kilomita le mamao, mai Mulifanua i Salelologa. E amata i le faletalimalo a le Sheraton Aggie Grey’s Resort ae tini tonu lava i le uafu i Salelologa.

O le a amata le aau a Bronwen i le ta o le ono i le taeao. I le faatonuina o lana taimi ma talanoaga e foliga mai e valu itula le umi o le aau a lenei tina.

I lana talanoa mai foi, na Ia ta‘ua ai, “Ua leva ona ou moe miti i lenei aau i le mamao faapenei. O lea la ua taunuu.” I ana tapenaga, o Bronwen e koleni i gataifale o lona nuu i Whangamata. O i e nonofo ai ma lona alii o Greg. Ma o le la pisinisi o le Whangamata Hire Centre.

O i latou uma e ulufale i lenei tauvaga e fai muamua le aau 10km ae ia i lalo mai o le 4 itula le umi o le aau i le 10km. O le faataitaiga la a lenei tina na faia lea i Long Bay i le masina o Tesema 2015. E ova laititi lava ma le 3 itula le umi o lana aau 10km.

O loo tapena nei la Bronwen ma lana veaga e Malaga mai i Samoa auā lenei faamoemoe. O le tulafono o le aau e sa ona pa‘i i le vaa lea e mulimuli atu. E tofu lava le tagata aau ma le vaa afi, ese ai ma le vaaalo i ona autafa. O le vaaafi o le a alu atu ai lē e kapetenia le aau, ese mai lea ma le ave vaa poo le kapeteni o le vaa.

E ono la vaa mai le Aiga i le tai ua uma ona faatonu mo lenei faamoemoe. E faaopoopo i ai ma le isi vaaafi saoasaoa mo le Koluse Mumu o le a mulimuli i le taaloga.

O le faamoemoe a le Samoa Events, o le a faia lenei tuuga i tausaga uma lava. E ui lava e toaitiiti le aofai o i latou mo lenei tausaga ae e oo lava ina toatele le aofai o tagata o le a aau i Savaii i tausaga oi luma.

Aau i Savaii

Aso – 7 Aperila

Mamao – 22.3km

Ala aau – Mulifanua i Salelologa

Suafa – Bronwen Burmester

Tausaga – 60

Taitai Aau – Moss Burmester

Alo vaa – Cole Burmester