E leai se isi lagona e sili atu nai lo le faafetai ma le faamalo i tamalii o le atunuu ua papale mai nei i le tofiga mo Faufautua i totonu o le uluai taimi ua tuufaatasia ai Aukilani i lalo o le faamalu e tasi, poo le Super City e pei ona suia ai nei.
O le afioga i le Tauaana Anae Arthur Anae, ma le susuga ia Alf Filipaina, o tamalii Samoa ia ua faamanuiaina ma ua tulai mai talu le faigapalota faaitumalo sa feagai ai.
E tele mataupu sa faailoa e Anae o le a ia finauina ma talosagaina e faaaogā i ai le avanoa ua ia tauaveina nei o se Faufautua mo le aai tele o Aukilani.
O se tasi lea o matatia ua ausia foi i lenei vaitaimi e tamalii o le atunuu i talafaasolopito o Aukilani lava latou ia. Ona o le taimi muamua lenei ua fai ai lea suiga mo pulega faaitumalo i totonu o le aai, a o uluai Samoa foi ia ua tulai mai ma filifilia i totonu o lana pulega fou.
O se feiloaiga ma Anae i le vaiaso talu ai, na ia ta‘ua ma faailoa ai vaega o le a agai i ai lona finagalo mo le faatinoina o le galuega.
E tele ma anoanoai mataupu, peitai e iai mataupu ua ave i ai lana faamuamua, ma ua sauni foi mo le finau malosi ina ia faataunuuina mo le manuia o tagata o le aai.
Saunoa Anae e aupito tāua lava tagata, ona silasila lea i manaoga manaomia o tagata, ae o le vaega mulimuli o le taumafai loa e fesoasoani ma faatunuu manaoga.
Mataupu lautele o le a finauina:
Ia faateleina ni galuega i totonu o le aai Atina‘e pisinisi ma falefaigaluega ina ia maua ai galuega mo tagata lautele Atina‘e ni polokalame ma galuega mo tupulaga talavou
Nofoaga tuai (brown field) ina ia talia ma toe faaleleia mo le lelei o le aai Ia tele ni eleele e avanoa mo pisinisi ma atina‘e a tagata Ia lava ni fale ma nofoaga e saunia mo tagata o loo autovaa mai i totonu o le aai.
Mataupu e fia tulituliloa ma ave i ai le faamuamua:
Atina‘e le tamaoaiga o le aai Atina‘e nofoaga mo mataaga Atina‘e le itu o taaloga, taleni ma faafiafiaga Ia lava ni atina‘e e faatosina mai ai tagata tafafao mai fafo Taofi ma vaai lelei le malaevaalele faavaomalo i Aukilani
Na saunoa Anae o mataupu e pei ona ia ta‘ua, e ao ina silasila toto‘a i ai le pulenuu ma le pulega o le Super City, ina ia faafetaiaia auā e tele ni penefiti o le a maua mai, aemaise lava o le manuia mo tagata lautele.
O le taimi nei e ao ina silasila i mafuaaga o le malaga ese o tagatānuu o Niu Sila ma le aai o Aukilani agai i Ausetalia ma isi atunuu.
O lona talitonuga o faafiafiaga, o taaloga ma le faaaogāina o taleni i auala talafeagai atoa ai ma tupe maua, o nisi ia o mafuaaga o le tuua e tagata o le aai ae malaga i fafo.
O le galuega la lea o le a feagai nei ma i latou o le taumafai e toe atina‘e vaega ia o loo fiafia i ai tagata, ina ia faatumauina pea le fia nonofo mau ma faaaogā le aai, faaaogā taleni e penefiti ai tagata uma e aunoa ma le toe malaga ese atu i fafo.
O le atina‘e o galuega tetele ma faafiafiaga tetele, o pisinisi o le tamaoaiga, o mataaga, turisi, faaleleia o foliga i fafo o fale ma nofoaga tuai, o le lava o fale ma eleele o le a mafai ai ona faatosina mai le toatele o tagata tafafao mai totonu o le aai, ma sasaa mai ai le tamaoaiga mo le manuia o tagata lautele.
E lē gata i lea o le a mafai foi ona unai mai tagata faipisinisi, o le a manuia ai tagata uma mo galuega e maua ai, o le atinaeina lava lea o le tamaoaiga.
Na ta‘ua foi e Anae o i latou o loo ua see i galuega o Community Board, o le latou matafaioi tonu e tatau ona agai i ai, o le faia lea o fonotaga ma feiloai ma tagata lautele. Ia lelei fesootaiga ma le mamalu o tagata o le aai, e talanoaina ai mataupu o loo finagalo i ai tagata, ma faapea ona iai ni auala e mafai ai ona faafetaiaia manaoga.
Ia vave foi ona feiloai ma momoli mataupu i tagata faufautua faapea le tofi pulenuu ina ia faia se faaiuga talafeagai mo manaoga ma mataupu uma.
O galuega a Faufautua o le unai lea ma fautuaina le pulenuu mo mataupu uma ina ia silasila i ai ma faia ni faaiuga, aemaise o le silasila foi agai i nisi metotia fou e faaleleia atili ai le aai ma tagata lautele.
Anae ma Len Brown:
Na fesiligia foi Anae i sona finagalo faaalia i le tulai mai o Len Brown i le tofi pulenuu o le aai, pe talitonu o le tagata tonu lea mo le tofi, ua iu i ai le filifiliga a tagata lautele?
O le saunoaga a Anae, na ia matuā faafetaia ai ma ioeina Brown i lona tulai mai mo le tauaveina o le tofiga pulenuu. E tele vaega e matuā lagolagoina ai e Anae, Len Brown, ma ua sauni foi e faaalia lona fiafia tele e galulue faatasi ma ia.
O se tagata e faigofie tele ona fesootai i ai, faigofie ona galulue faatasi ma soo se tagata, ma e iai foi lona faaaloalo mo soo se gagana ma soo se lanu.
O le isi foi lea vaega sa ta‘ua e Anae ma faailo ai sona lagona mo le toatele o le mamalu o le atunuu i lenei vaitaimi. Aemaise lava pe a oo mai i le tulaga o polokiki. Na faaalia e Anae, o nisi lava ua avea polokiki ma auala ua galo ai ma tauau ai ina see ese ma tu ma aga a Samoa, o le faaaloalo i tagata matutua.
O se finagalo tuusa‘o lava o le Tauaana, o se toe faamanatu ma se fafagu aemaise lava i latou ua amata ona galo le faa-Samoa ma tu masani, ina ia toe faaolaola lea tulaga lelei ma le tausafia e iloa ai Samoa i fafo ma le va ma isi atunuu o le lalolagi o loo nonofo faatasi i Aukilani.
