E fai Kirisimasi i Sini nei alo e toalua o Samoa na malaga mai mo le ono masina i se sikolasipi a le Illawarra Dragons e koleni ma aooga ai i totonu o le NRL i itu uma e tapena ai mo le lumanai pe a maua ni a la konekarate.
Albert Satupaitea Viali (20) faapea Gordon Lemisio (22) ua o la maua lenei avanoa mai le 400 o tama taaalo Samoa na masii atu le Dragons ma faia ni koleniga i le tausaga nei.
E lē gata o le 400 ae na vaaia foi le faaitiitia mai o lea numera i le 34 mo filifiliga faaiu. O le taimi nei o se avanoa faaauro o loo iai laua nei i Sini mo toleniga.
Saunoa Nigel Vagana a uma lo la taimi faatapulaaina, ma o le a tagai i ai le kalapu po ua ausia le tulaga o moomia e le Dragons ma amata saini loa a la konekarate.
O loo i Sini nei mo le vaiaso le tina o le alii o Albert Viali mai Vaimoso, Tufuiopa, Salailua le tina ia Frances Belford Viali o loo asiasi mai i si o la alo. O le tamā o Albert na taalo i le taitoafitu a Samoa i le 1990 le susuga ia Tanielu Viali lea foi e manatua e le toatele mai le Kolisi o Avele 1984, aulakapi a Vaiala ma Vaimoso aemaise le ausoka siamupini a Vaivasetai 1984-1987.
O le alii soka iloga ia Tim Cahill o le tausoga o le alii o Albert Viali lea na saunoa Nigel Vagana, o se tama taalo iloga mo le lumanai. Faatoa taalo liki lea o Albert auā o le Iuni lava e masani ai Samoa. O se avanoa lelei foi mo Gordon Lemisio lea sa galue i komepiuta i Samoa (IT) ma o lana taleni lakapi ua maua ai lenei avanoa lelei.
