O se tasi o alo iloga o le atunuu ma le Toa Samoa ia Ricky Leutele o loo taulamua pea i le malosi ua iai nei le Cronulla Sharks sa manumalo i le Roosters i le vaiaso talu ai 20-12 faapea le Aso Faraile lea na manumalo mataina ai i le Knights i ‘ai e 22-6 i Remondis Stadium.
I le taaloga ma le Knights e ui o le malosi o Newcastle lea foi sa tauivi mai ai BJ Leilua, David Faalogo ma Akuila Uate, ae sa lē faavaivai ai Ricky Leutele ma le Sharks. E ui o le tino laiti o le laina i tua a Cronulla ia Jack Bird, Valentine Holmes, Sosaia Feki ma Ben Barba, ae na lē solomuli la latou puipui i osofaiga a le Knights.
E na o le tasi le sikoa a Newcastle na maua e Akuila Uate la latou uigi ma le kiki na ova a Tyrone Roberts. Ae peitai o sikoa a le Sharks na maua lea e Jack Bird, Luke Lewis mai se kiki puupuu agai atu i luga o le laina sikoa.
O le sikoa a Ben Barba na maua mai foi i se kiki a Jack Bird i le tulimanu ma sapo e Ricky Leutele ma pasi atu i luga o le laina lea sa momo‘e atu ai Barba ma tatao le polo i le tulimanu. O le sikoa a Chris Heighinton na maua foi i se osofaiga na malosi ai le tamoe a Ricky Leutele ma faaauau ai lava.
O se vaaiga lelei lenei e lē gata mo le Sharks ae faapea foi le sauni atu o le Toa Samoa mo le filifiliga o lana au e fetaui ma Tonga i le Gold Coast i le tolu vaiaso o i luma. Cronulla Sharks 22 (Bird, Lewis, Barba, Heighington; Gordon 2, Holmes 1 goals) manumalo ia Newcastle Knights 6 (Uate try; Roberts goal) i Remondis Stadium. Aofai tagata maimoa: 10,057.
