Ua sefulutasi tausaga talu ona pasia e le Palemene o Samoa le tulafono e faamalosia ai le ave o fanau i le aoga ae peitai o le molimau a le Matagaluega o A‘oga Taaloga ma Aganuu e lē o foia ai le fafitauli.
O loo vaaia pea le toatele o fanau i nofoaga eseese o le taulaga i taimi o aoga o loo feoai solo ai ma faatau oloa eseese, poo le feofeoai solo foi e lē oi totonu o ni potu aoga.
O le Aso Faraile na tea nei na taloina ai e le matagaluega se feiloaiga ma sui o le au faipisinisi e faamalamalama ai aiaiga o le tulafono e faamalosia ai fanau e ave i le aoga, ma faailoa foi i ai faasalaga ua aiaia e mafai ona faasala ai ni mātua poo ni tagata o vaaia ni fanau, faapea foi ni pisinisi latou te soli aiaiga o le tulafono.
O le molimau a le Pule Sili o le Matagaluega le afioga Matafeo Falanaipupu Tanielu Aiafi, e tele molimau i le tausaga ua mavae i le vaaia pea o fanau iti e lē o agai i ni aoga ile taimi mai le 8 i le taeao e oo i le 2 i le aoauli. O itula foi ia o loo aiaia i le tulafono e tatau ona iai se tamaitiiti i le faleaoga.
E ioe le Pule Sili e iai fanau iti o loo faaaogā e nisi o pisinisi e faatau atu oloa. Fanau ia o loo vaaia pea i le taulaga ma nofoaga faitele o loo faatau savali ai oloa eseese.
O le alii leoleo satini sinia le susuga Kaioneta sa faailoa ile mafutaga ma le au faipisinis o loo iai se isi tulafono o loo fausia ile taimi nei, e sili ona malosi atu e puipuia ai le fanau. O se tulafono o le a agai tonu ile vaaiga ma le puipuiga po fanau.
O lona uiga o le tulafono e faamalosia ai le ave o fanau i le aoga ua na o itula mai le 8 i le taeao e oo i le 2 i le afiafi o loo faamamafa le tatau ona ave ai fanau i le aoga, ae o le tulafono o loo fausia nei, o le a 24 itula le matafaioi a mātua ma soo se tagata i le vaaiga o fanau.
“E sili la ona malosi le tulafono lea, ae o le a tatou tālia se taimi e oo ai i le Palemene ma pasia”, o le saunoaga lea a le alii leoleo satini sinia.
O le vaiaso nei ua alu ai se asiasiga a sui o le matagaluega o aoga ma le matagaluega o leoleo, e siaki le taulaga ma nofoaga uma i le talafatai o Apia e vaavaai poo iai ni fanau o feoai ai e lē o agai i le aoga.
Mo le silafia o nisi lava o fanauiti ua lē o i se aoga o latou ia ua avea ma tagata sili ona faalagolago i ai tagata matutua i o latou aiga i le sailia o seleni e tausi ai le soifuaga o aso uma, aemaise lava o mea fai i aso uma ma pili e totogi. O oloa eseese o loo faatau e ia fanau, o loo mafai ona fesoasoani ai io latou mātua.
O vaaiga masani foi e masani ona vaaia i le taulaga, e iai tagata matutua e o atu ma ia fanau. E nofonofo solo i latou i nofoaga o le taulaga ma faatalitali le taimi e foi atu nisi o le fanau ma seleni mai oloa o loo latou faatau.
O oloa foi ia ua talitonu le matagaluega o aoga ma leoleo, o loo ave i ai e nisi o le aufai oloa ma le au faipisinisi.
