O aiaiga ma tuutuuga sa taoto mai i le va o se ulugalii, e toe tasi lava se mea malosi a le tamaloa e pa‘i i lona tolua ona tetea lea i le nofosala o le tamaloa i le falepuipui. Ae ua avea foi le tulafono ma auala ua lē iloa ai e le fafine lo la va nonofo ai ma lona toalua ae ua oso fia ulu ae taumafai e toso mai le tamā e fai ma siusiu. O se mafutaga a le ulugalii ua taapeape i le taimi nei ona ua lē lavā e le tamā onosai i faiga a lona toalua ia te ia, talutalu ai lava le tulafono. Ua silia i le sefulu tausaga talu ona nonofo ae fai ma masani le tauaimisa soo.
O le tamā o ia lea e faigaluega ae o le tina e nofo fale. O le tele o taimi e vevesi ai lea aiga e onosai ai lava le tamā i faiga a lona toalua, ae sasao faatama fusu ai le loomatua i ana mea malolosi e tau ai i gutu ma le ulu o lona toalua auā o loo ia mautinoa e lē mafai ona paia lona tino i se mea malosi a le tamaloa ona o loo nofo i lalo o le tulafono.
O se tasi aso na toe vevesi ai lea aiga ma toe osofai malosi ai e le tina lona toalua i ana apakaki i le auvae ma le mea malosi i lona ulu, na lēe lavā e le tamaloa tatali lona ita ma iu ai i lona faaleagaina o meafale i totonu o lona fale ae lē pa‘i lava i lona toalua. Na tu i luga le tamā ma alu ese ina ia taumafai e faafilemu lona mafaufau faatasi ai ma lona atalii.
Ua ioe foi lona lagona e sili ai le nofo ese nai lo le toe foi i lona toalua ma toe tupu ai se isi faalavelave. Ua fautuaina foi e nisi o lona aiga e sili lava le puipuia nai lo le togafitia, auā e lē iloa se isi auala a le fafine lenei e toe osofaia ai o ia ma faamavae ai ma le olaga nei.
Ae lē gata i lea ua tele foi i latou ua alolofa i lenei tamā ma talanoa i ai i le tagata e pulea lona loto nai lo le tagata e aea le ‘olo, ua nofo ai nei na o le tina i lona aiga ae o loo faaauau pea le tuuaga a le tamā.
O le ata vaaia o mātua o lenei aiga ua oo ai lava i fanau ua taapeape solo e sue mea e nonofo ai. Sa tatau o le tamā o le ulu o le aiga ae o le tina o le fautua, ae o fanau o le lumanai manuia o aiga. E tafe mai mauga manuia o aiga.
