Ua sauni atu nei le Malo o Ausetalia e faaeaina se tamā Samoa ia Sivei Ah Chong e 43 tausaga ile pitonuu o Minto ise pine tauoloa maualuga i lona faasaoina lea ma puipui le soifua ose tagatānuu sa osofai ese alii e lagolagoina le vaega faatupu faalavelave ole ISIS ia Ihsas Khan i lenei faalavelave.
Sa osofai e Khan se tamā e 59 tausaga e suafa ia Wayne Greenhalgh ise naifi ma afaina ai lona tino, ole ua ma ona lima ma sulu atu ai lenei tamā i totonu ose fale otiulu ma loka le faitotoa a‘o taumafai Khan e talepe ma sao atu i totonu. Sa molimauina e i latou na iai le tauvalaau a Khan “Allah Akbar” ile taimi ole osofaiga ma ia tuua‘ia ai le maliliu o o latou tagatānuu i Iraq i autau a Ausetalia ma Malo Aufaatasi. Na faasalavei Sivei Ah Chong le alii faatupu faalavelave ma ia faatonuina ai Khan e tuu ese le naifi ma aluese, ae sa faamata‘u e Khan ia Sivei e nate faaumatia le ola o Sivei auā ua sauni e oti.
Sa taumafai Khan e toe tamoe atu e osofai Wayne i totonu ole faleotiulu ae sasa loa e Ah Chong ise laupapa. Sa iai foi i lea taimi le atalii o Sivei ia Derek Ah Chong ma sa ia molimauina uma nei gaioiga.
Ose molimau a Sivei ana iai se fana ia Khan e faapenei e maliliu uma latou ma Wayne. Ae peitai ole faasaoina ole tamā matua mai le faaumatia o lona ola ile naifi a Khan ua viia ai le lotoalofa male lototoa o lenei tamalii Samoa.
Ua faasolosolo manuia Wayne ile falemai i Liverpool ae oloo taofia pea ile falepuipui Ihsas Khan ina ua teena ele faamasinoga lana talosaga e tatala o ia i tua e faatali ai le aso e tulai ai ile faamasinoga e tusa ai ole solitulafono sa ia faia.
