Ua silia ile sefulu tausaga talu ona faaofi i aoaoga o tomai faapitoa le galuega faatusitala ma faasalalau ile aoga o matata faapitoa ma le Iunivesite aoao a Samoa. Na amata ile tusipasi e maua pe a faaiuina aoaoga, sosoo ai ma le faailoga Tipiloma ae ua taumafai nei e siitia le faailoga maualuga e maua pe a faaiuina aoaoga ile faailoga ole BA.
Ose taumafaiga lenei ua lagolagoina ele asosi a tusitala ma le aufaasalalau le JAWS (Journalist Association of (Western) Samoa) e pei ona tūtūaai le Peresetene ma le asosi e ave le lagolago atoa ile Iunivesite mo le faatulagaina o aiaiga ole sueina ole faailoga.
Ole Aso Faraile ua mavae na faia ai le faatalatalanoaga ile va ole Iunivesite ma sui ole asosi a tusitala ma le aufaasalalau sa folasia ai manatu ile fesili pe faapefea ona iloilo le sueina ole faailoga ona e tatau ona mautu se fausaga e ausia ai manaoga o aoaoga faaiunivesite.
Ose alii faiaoga i lenei tomai mai Ausetalia o Dr Mark Hayes sa taulamua ile faataotoina ose ālafua e lima taitaiina ai le Iunivesite aoao a Samoa ma le asosi a tusitala ina ia mafai ona maua ai se faataotoga lelei mo i latou ole a fia sueina le faailoga.
Faaalia ese tasi o tamalii sa tautua ile galuega le afioga Le Tagaloa Pita nate lagolagoina le sueina ole faailoga. O lenei tamalii sa iai lana nusipepa o le South Sea Star sa logologoa foi lana tautua i Samoa i tausaga ua mavae. Sa ia faatautaia foi se tasi o nusipepa na faaigoa o le Fau Gagana. O ia foi ose tasi sa avea ma faipule ole Palemene ma avea ai ma Minisita ole Kapeneta i nisi o faigamalo ua tuanai.
Ole luitau o tapenaga ua amata faagasolo mo le sueina ole faailoga BA ile galuega tusitala ma le faasalalau poo le ā le maualuga o maka poo togi e tatau ona ausia ese tama poo se teine ua iu mai le vasega faavae ole Iunivesite aoao e tatau ai ona ausia lona faamoemoe e fia sueina le faailoga.
Oloo silasila foi pe tatau ona aofia loa le sueina ole tomai faatusitala ile faailoga lava lea ae ia ave ma nisi o mataupu e filifilia ese tasi ole a fia sueina le BA faatusitala.
Ole isi masina o sosoo ai nei ole a toe faia ai faatalanoaga ina ia saga faamautu pea taiala ma faiga faavae a‘o lei tuuina atu le auivi atoa i luma ole Fono Faatonu ole pulega ole Iunivesite mo se latou fautuaga ma se faaiuga mulimuli.
