E moni upu ale atunuu e lele le toloa ae maau ile vai. Ose vaaiga lea na iai se sailiga seleni a aiga, uo ma ē masani mo le fesoasoani ile malaga ale atalii ma nisi o lana aulakapi Canterbury Bulldogs ile tauvaga Harold Matthews mo Niu Sila lea ua taliu manuia mai e sauni atu ai mo le vae faaiu mo Aferika i Saute.
Ole alii talavou ia Kolisi Fagasoaia Toomata ole alo ole tina ia Kuini Fagasoaia Toomata ma le Tofa Moefaauo Kereta Faatonu Toomata lea ua filifilia nei ile aufili laiti a NSW.
O i laua nei oloo galulue tiakono ile EFKS Fairfield ma na vaaia i lea po le lagolago a sui ole ekalesia mo le faamoemoe o lana lupe faalele ua ofi atu ile aufili nei a NSW lakapi. Ose tama e vaaia pea le usitai i totonu o lona aiga ma auai atu ile Aoga Aso Sa faapea le lotu ma mātua, ose mafuaaga ua a‘e manuia ai lona taumafai.
Sa vaaia foi le lelei o lana taalo ile vae na malaga atu ai i Niu Sila, ma ose tala mālie i mātua, ekalesia ma aiga sa nofo tapuai atu i faiva sa feagai ai. Na masii mai foi nai o latou aiga mai isi setete o Ausetalia aemaise Niu Sila sa malaga mai ai nisi e opogi si o latou faamoemoe na mafai ai na auai atu Kolisi i lenei malaga taamilo.
E lē gata i aiga ae na valaaulia foi se ausiva mataina e tautoalua ma le faaili mālie ale Three Seasons e faafiafiaina lenei faamoemoe. Sa maualuga foi lea sailiga seleni ile lagolago ale Fono Aoao a Samoa auā tupulaga lalovaoa ua faamanuiaina ile taleni ole lakapi ma fesoasoani i mātua, aiga ma le lotu.
O aiga na lua mai Aleipata ole tina ia Kuini ma aiga i Vailima ma Lufilufi ole tamā ia Moefaauo Kereta na maau ma milomilosia mo lenei famoemoe. Sa lava ma totoe le seleni na ausia ma faafetaia ai e mātua ole tama lakapi le lagolago o aiga ma uo aemaise le ekalesia.
Ua lē gata ole sao atu ole atalii i nei taamilosaga ae ua tālia nei e mātua ma aiga le vaitau e ono sao atu ai i filifiliga o ‘au tetele a NSW, Ausetala poo Samoa foi lenei alii talavou iloga ia Kolisi Terence Matthias Fagasoaia Toomata.
