O le masii mai o le falasiigata i le taitaifono, le afioga ia Valavasa Lemalu ma lana komiti galulue mai Samoa, ona o le faamaoemoe o le ekalesia mo se fesoasoani tau seleni, i le mauga o le Atua o loo fausia i le taimi nei i totonu o le afioaga.
E mae‘a le faamoemoe i le Aso Toonai a ua mafai ona faamaopoopoina le seleni e pei ona ta‘ua e $41,000, peitai sa faamaonia mai e sui o le komiti sa malaga mai Samoa, e iai nisi o vaega tupe e lei tuuina i ai i le aofaiga lea.
O se vaega tupe tele pe a fuafua i le toagaogao o le mafutaga a le afioaga i Niu Sila nei, sa toai ma taunuu mai i ai le aumalaga mai le Samoa.
E lē gata foi i lea, a o Niu Sila lava latou ia faato‘ā mafai ona tuufaatasia ina ua taunuu mai sui o le ekalesia na malaga mai.
O se taimi faavavevave lava na feiloai ai, peitai sa vaaia ma molimauina i lea aso le lotonuu ma le lagona faa-Isaraelu moni, e ala i le foai, ma le aao mafola e ala i seleni, atoa ai ma le tapenaina o le faamoemoe o lea aso.
O le upu moni e masani ona fai le itumalo o Falealili, pe afai o faafofoga mamao mai i le faamoemoe o le ekalesia. Ia ua ta fia Falealili fua, pe a silasila ma tagai i le faatinoina o faamoemoe.
Na sasaa atoa i ai le faimea lelei ma le tautua nuu o i latou o loo alaala ma papaaao i Niu Sila.
O se vaaiga ese foi sa maitauina i lea aso, talu ai e lei mamafa tele i le tulaga o le aganuu ma le faa-Samoa e pei ona masani ai aso faapenei. Peitai sa faafaigofie mea uma lava aemaise ai o le polokalame sa faatulagaina. O le faigofie ma le lava tapenaina o tulaga uma o le aso, sa o faatasi foi ma le manaoga e pei o le faatalauula mai o le faiga malaga.
O le afioga i le sui taitaifono o le mafutaga a Niu Sila, Sosoatu Saena sa fai ma fofoga o le aso i le faafoeina o le polokalame, ia ua tala fetaui lelei lava foi ma le ituaiga faafoe sa faagasolo ai, i le vave, ma le sosolo lelei i le taimi sa faatulagaina. O le ituaiga tagata tonu lava foi ia o aso faapea.
E toalima na malaga mai Samoa e pei ona faamaonia mai e le afioga i le taitaifono. O Valavasa Lemalu o le taitaifono, Laufau Faalavaau Toilolo o le sui taitaifono, o le susuga ia Tafai Noa Tugaga o le teutupe, Etuale Vou Olivia o le failautusi, ma le lagolagosua le susuga ia Suli Prichard Asiata.
O le mafutaga i Niu Sila nei o le afioga ia Seumanutafa Silupe Hick o le taitaifono, o le sui taitaifono o le afioga ia Sosoatu Saena, susuga ia Pisaiga Aitiope Saena o le failautusi, ma le teuoloa poo le teutupe o Mua Johnson. Saunoa le afioga ia Valavasa o le taitaifono mai Samoa, o se tulaga manuia foi lea ua iai nei, ona ua mafai ona amata se mafutaga e feiloai ai ma mafuta ai tamalii ma tamafanau a le ekalesia ma le nuu i Aoteroa nei.
E mae‘a le faamoemoe faato‘ā tea le tasi i le aoauli, ona o le galulue faatasi o le fofoga o le aso, ma vaega eseese sa faatulagaina.
O le tasi lea o tulaga sa maitauina, ma maimau foi pe ana se‘i agai atu i ai le toatele o le au faimea uumi i ituaso faapea, se‘i silasila ma molimauina le tulaga sa iai le faamoemoe o Tuanai.
Na saunoa manino Laufau Toilolo o le sui o le ekalesia mai Samoa e faapea o le galuega ua amata, ma e $200,000 le seleni sa amata ma faavae ai le galuega. O le mauga o le Atua e tapuaia ai le afioaga o le faamoemoe lava lea e tasi e pei ona malaga mai. O seleni uma foi o loo faamaopoopoina i lenei taimi, e agai uma lava i le auga e tasi o le fausia lea o le malumalu tapuai o le nuu.
O le afioga lava i le taitaifono mai Samoa le afioga ia Valavasa, sa fai ma fofoga o le ekalesia i Samoa, ma le aumalaga na malaga mai, e faafetaia ma tali faitau i le foai paia ma le aao solo ane o le atunuu, aemaise o tamafanau a le afioaga, sa lagolagoina le faamoemoe, e ala i seleni ma tupe sa foai. Sa faafetaia foi e Valavasa le fesoasoani a le mafutaga i Niu Sila, ua maualauga ma mafai ai ona faataunuuina le aso sa tuupoina.
O le vaiaso fou ua fuafua e toe taliu ai le faigamalaga i Samoa ma le malie atoatoa ona o le talileleia ma le alolofa i le faamoemoe na malaga mai ai. E ui ina ia mae‘a le aso faapitoa ma le faamoemoe sa malaga mai, peitai ia o loo mafai lava foi ona fesootai ane pea, ma talia nisi foai mulimuli ane pe afai o loo musumusuina pea finagalo e la Agaga o le Atua e faia ai se mea lelei mo lana galuega.
