E valu masina o nofo le tamaitai lenei i totonu ole Campus of Hope. Ole lotoā lea e tasi lava le faitotoa ole alu i fafo ma le alu i totonu.
E nonofo faasoloatoa ai lava tamaiti ua manumalo mai sauaga ile ao ma le po. Ole tulaga foi lea na oo iai le tamaitai talavou iva tausaga lea ua manumalo mai sauaga a lona ia lava tuagane.
Oloo taofia lona igoa ma lona aiga, faapea foi ma lona tuagane na afua ai ona aveese mai lona aiga ma tausi i lalo le vaaiga ale Toomaga mo ē Puapuagatia mo le valu masina.
Ua uma le faamasinoga ma ua faasala faafalepuipui ai nei lona tuagane.
I faamaumauga o lea mataupu ale Toomaga, na iloa ai, le vave tele ole alu ale taimi, e fua ile taunuuga ua iai nei. Sa aafia ai lea teineititi i sauaga, talu ai o nisi o taimi sa leai se faaeteete ma oo atu ai i puapuaga ma avea ai foi ma faafitauli i isi tagata.
Na ta‘ua ele Peresetene, e lē mafai ona tatou unaia le leaga ile teineitiiti talu ai le faaletonu ma aafiaga na oo atu iai. Auā o totonu o lona ia lava aiga, e leai se filemu o maua ai.
Ile faatalanoaga lava ma le Peresetene ia Siliniu na ia saunoa ai, ua laitiiti tele lenei teine e faatusa ile faaletonu ua oo iai, ma o taimi faapenei e manatua lava e tamaiti mea na tutupu ai, ae ua afaina lea taimi mu‘amu‘a ole olaga ole tamaitiiti sa tatau ona fiafia ai ose teneitiiti laitiiti.
Saunoa Siliniu, ua uma le faamasinoga, ma ua faasala ile falepuipui lona tuagane, ma oo atu ai lona aiga ile pulega ole Toomaga e ave le teine ile fale. Ole nofo ai ma vaai ele Toomaga o lea alualutoto, ua ta‘ua ele pulega, ose fiafiaga foi lea mo le Toomaga, ina ua mafai ona fesoasoani e faasaoina mai lea afafine.
Na faia iai se polokalame faatalatalanoa faapitoa mo ia, ma ose faamanuiaga lona ia foi nofo ai ile lotoā ale Campus of Hope.
Ole aso ole faamavaega e pei ona molimauina ile ata, e lē gata ose fiafiaga i lona aiga, ina ua mafai ona aumai i fafo le teine latou te o ile fale, ae ole faafetaia foi ele pulega ole Toomaga, ole avanoa ma le faamoemoega ole Faamasinoga ma le aiga, na latou vaaia ai lea afafine.
Na faafetaia ai e Siliniu talosaga ale atunuu, auā ole taunuuga lava lea ole galuega oloo faia nei i Tuanaimato.
O sauaga eseese oloo avatu ai nei fanau ile Toomaga
Na molimauina ele Tusitala se tasi o tamaitiiti, sa nonofo faatsi ma taifau ale latou aiga. Ile taimi na molimau ane ai ile pulega ole Toomaga.
E avane ile Toomaga ua fula le manava e lē mafai ona tautala, e silaloa ma lē iloa le taimi e fai ai lana feau mamao ma le feau lata. O masaloga ole pulega, ole tasi lena o mafuaaga na ave ai faamomoe faatasi ma taifau ele latou aiga. Ua alu tausaga ma aso o tausia pea ele Toomaga lea atalii, ma ua molimauina ile taimi nei le faasolo ina manuia. E ui ina pamper faasoloatoa, ae ua mafai ona iloa le taimi e manao ai e alu ile faleui.
Ua mafai ona tautala ma matala mai tala, ma ua amata ona fiafia i tagata, ua iloa ‘ata ma iloa fiafia. Ua taaalo faatasi ma isi tamaiti saoloto mai sauaga, ua taaalo ma fai tifiga, ua alu ile lotu ma alu ile aoga, taele i aso uma ma mamā felesi faasoloatoa.
Ole isi lea o fetu pupula oloo iai nei ile lotoā o fanau ua saoloto mai sauaga i Tuanaimato, le Campus of Hope.
