Ua saoloto ni taulelea se toalua mai le moliaga o le fasioti tagata paivalea na faamaonia e se laulau o faatonu sa iloiloina molimau a leoleo ma molimau tetee a i latou na molia ona o le maliu fasia o Afioga Tumaunei Sio ia Oketopa o le tausaga e 2013.
O Loi Apaau, Talatonu Leiataua ma Elisita Peniata sa molia uma i le fasioti tagata faamoemoeina ma faia ai loa le faamasinoga.
O le suesueina e le faamasinoga o talosaga apili na silasila ai i le talosaga a Loi Apaau ma Talatonu Leiataua na tuuina atu e ala ia la loia o Faaolesa Katopau Ainuu ma Rosella Viane Papalii, sa finauina le soloia o le faaiuga a le laulau o faatonu na faamonia ai moliaga o i laua.
Na faavae le talosaga apili i le iuga a le laulau o faatonu na faalēaoga ai le moliaga o le fasioti tagata faamoemoeina faasaga i le alii o Elisita Peniata ina ua lē mafai e molimau a leoleo ona ta‘usalaina lea taulealea. Peitai sa lē faamaonia le moliaga fasioti tagata faamoemoeina o Loi ma Talatonu ae faamaonia e le laulau o faatonu le fasioti tagata paivalea le manslaughter.
Na faavae lea faaiuga a le laulau o faatonu i le molimau a le alii fomai na feagai ma suesuega i le mafuaaga o le maliu, lea na faailoa ai i le faamasinoga o le tu‘i e tasi e mafai ona mafua ai le maliu o Afioga lea na ta‘ua e leoleo ia latou molimau o le tu‘i lea na palasi ai i lalo lē ua maliu ma tau se vaega o lona ua (neck) i se pito o le si‘o piliki o le fale sa tupu ai le faaoolima.
Peitai e mafai foi ona faapea na mafua le maliu ona o le gaioiga na feaa ma fekiki ai lē ua maliu. O le gaioiga lea na faailoa i ni molimau a le itu a leoleo ae e autu lava le mau o suesuega o le maliu na mafua ona uma le ola o lē na aafia o le tau o se vaega o lona ua i le pito o le si‘o piliki lea na maua i sailiiliga faafomai e ala i se taotoga faapitoa na masae ai se tasi o uaua malosi.
O le faalavelave lenei na mafua i se inuga pia a lē ua maliu ma i latou e toatolu na molia. O alii o Loi ma Talatonu sa faaalia i se molimau a leoleo na la feaa ma fekiki lē ua maliu peitai a fua i le molimau a le fomai ma le taunuuga o suesuega i le mafuaaga o le maliu e feteenai ma molimau a leoleo.
E manatu le faamasinoga o talosaga apili sa taitaiina le faaiuga a le laulau o faatonu na solofua ai le moliaga o Elisita Peniata ona o mau a leoleo, ae na faamaonia moliaga o Loi ma Talatonu ona o mau faafomai peitai sa tatau ona solofua uma moliaga pe a fua i le molimau a le fomai ma le suesuega e ala i le taotoga faapitoa na sailia ai le pogai tonu o le maliu o lē na aafia.
Ona o ia sailiiliga i mau o le mataupu ua faia ai le faaiuga a le faamasinoga o talosaga apili le Court of Appeal e solofua moliaga o i laua na faauluina le apili sa finauina ai le faaiuga na faamaonia ai o la moliaga.
O le taunuuga o lenei suesuega ua lē toe faia ai se isi suesuega faafaamasinoga. O lona uiga o le mutaaga lea o le mataupu ma ua solofua uma moliaga o i latou na tuuaia.
