Ua faamatuu atu se avega mamafa sa tauaveina e le mafutaga a Samusu i Aleipata i Aukilani ina ua faamamaina le igoa o le latou ekalesia Katoliko i Samoa i le aitalafu o le latou galuega sa fai i Samusu Tai i le fausiaina lea o le malumalu tapuai, o le maota o le galuega, hall a le ekalesia faapea le pa o loo sioina ai lea galuega tele sa gafa ma le mafutaga faapea le ekalesia i Samoa.

O le aso 3 o Iuni i le tausaga e 2016 na amataina ai lea galuega ma sa taufai togi maa uma iai tama fanau o Samusu i Aukilani e ala lea ia latou sailiga tupe i po siva a le mafutaga, o lulu faatasi ai ma le latou tusigaigoa sa fai. O le tele o mea o le galuega, sa tau ofo tagata o le ekalesia i Samoa faapea le mafutaga iinei e foai nisi vaega aua le faatotogaina o le galuega, ma o le ala foi lea sa tele ai se fesoasoani ma se faamama avega i le fausiaina o lea galuega tele. O le tau aofai o le galuega e $950,000.00, ae ese mai ai le lima foai ma le agalelei o matafale ma aiga taitasi o le ekalesia ma le mafutaga.

O le aso 21 o Tesema i le tausaga ua mavae 2017 na umusaina ai loa lea galuega i Samoa, i Samusu Tai i le nofoaga o loo iai le malumalu tapuai, o le hall, o le maota o le galuega faapea ma le pa. O se galuega ua galulue fiafia ai le susuga i le fesoasoani ia Paulo Tamausu ma le faletua ia Atinae Tamausu, aua ua tau lau o le faamoemoe na moomoo iai le loto ma le agaga ina ia lelei ma matagofie mea uma aua le galuega a le Atua.

Mafutaga alo ma tama fanau Samusu i Aukilani

Mafutaga alo ma tama fanau Samusu i Aukilani

Ina ua maea le umusaina o le galuega na totoe mai ai loa le aitalafu a le ekalesia e $230,000.00 i le kamupani sa auala mai ai le galuega, ma o lenei aitalafu sa le mananao le mafutaga i Aukilani ma le ekalesia Katoliko i Samoa e umi ona iai i le kamupani, ma e iai foi le talitonuga e tatau ona vave ona faamama aua o se tasi lea mea o le a avea ma faalavelave i tagata lolotu ma tagata o aiga. Na faaauau sailiga tupe a le mafutaga i Aukilani ina ua foi mai i Samoa i le umusaga e ala lea i lafoga a matafale e sefulu valu o loo i totonu o le mafutaga, e togitogi ai le aitalafu o loo totoe, faatasi ai ma le galulue faatasi ma nisi o alo ma tama fanau a Samusu o loo i Ausetalia faapea foi ma le ekalesia i Samoa.

O le aso 9 o Iuni i le tausaga nei na aloaia ai loa le faamamaina o le igoa o le ekalesia a Samusu Tai mai le latou aitalafu. O le lagona o le fiafia ma lagona o le faafetai na pepese ai le mafutaga a Samusu i Aukilani nei ina ua lafo mai pepa o le aitalafu mai Samoa e susunu iinei e faailoa ai ua mama le aitalafu a le ekalesia.

O le aso Toonai ua mavae na pepese ma alalaga fiafia ai le mafutaga a Samusu i Akulani e siitia le viiga o le Atua ona o lana foai i tupe e ala mai i galuega i totonu o le mafutaga ua faataunuuina ai ma le manuia le galuega sa faaatinoina i Samoa. Ua feofoofota’i lagona o le loto ua tumu i le olioli ma loimata o le fiafia i lea aso ina ua susunuina faatasi pepa o le aitalafu sa lafoina mai ua faailoa ai ua maea le aitalafu a le ekalesia i Samoa. Ua le toe iai se mea e atugalu ai le mafutaga faapea le ekalesia aua o lea ua maea le galuega sa galulue ai. Ua saoloto le mafutaga i Aukilani ua saoloto foi le tapuai o aiga lolotu i Samoa i le latou galuega fou.

Taitaifono ma tama o le mafutaga a Samusu i Aukilani susunuina pepa o le aitalafu

Taitaifono ma tama o le mafutaga a Samusu i Aukilani susunuina pepa o le aitalafu