“Leiloa pe aisea, loga uiga e faakali se‘i sui aku le isi sui Komesiga ona pasi lea iai ole polo”
Ole faaiuga ole vaiaso lenei e mae‘a ai le masina atoa o avea le Komesina lagolago le afioga Afamasaga Michael Soonalole ma sui Komesina ae see atu le isi Komesina lagolago le susuga Fauono Talalelei Tapu, e nofoia le nofoa ole sui Komesina.
Peitai ua masua mai i fafo ni lagona faanoanoa o nisi o leoleo sinia ona e iai faaiuga e tatau ona faia ele afioga Afamasaga oloo avea nei ma sui Komesina ae lē iloa pe aisea ua lē faia ai. “O lea ua taunuu le fautuaga ale ofisa oloo nafa ma mataupu tau solitulafono e faia ni moliaga ose alii leoleo suparenitene ae e lē o iloa pe aisea ua lē faia ai”.
“O lea foi ua mae‘a le suesuega ale PSU (Police Professional Standards Unit) ile fana AK-47 ua lesitala ile igoa ole Matagaluega o leoleo ae leai lava se faaiuga ua ia faia”, ole finagalo lea ose leoleo sinia ua lē manao e faailoa lona suafa, ae oloo ia manatu atonu oloo faatali le sui Komesina se‘i sui atu le isi Komesina lagolago ile tofiga ona faatoa faia lea oni faaiuga o ia mataupu.
Ole leoleo suparenitene oloo iai le fautuaga ale ofisa o mataupu tau solitulafono (National Prosecution Office) e faia ni moliaga, oloo tuua‘ia i lona faia ose gaioiga ise auala faaalatua ua noatia ai le faataunuuina ole faiga ole amiotonu ile faamalosia ole tulafono.
Ose alii leoleo sa galue ile vaega o taavale afi ua faamuta lona toe avea ma leoleo oloo aafia i lea gaioiga sa mafua ai se suesuega faalotoifale ale matagaluega o leoleo ma mafua ai le lipoti o lea suesuega ua taulimaina ele ofisa o mataupu tau solitulafono lea ua faia ai lana fautuaga e faia ni moliaga solitulafono ole leoleo sinia oloo umia le tulaga faaleoleo suparenitene.
Ole suesuega ile fana AK-47 na faatonuina ele afioga ile sui Komesina ina ua ia tauave le pulea ole matagaluega a‘o faamalolo lē tumau ai le Komesina o Leoleo ona o moliaga oloo taoto ile faamasinoga.
Na toe fesootai ile sui Komesina ise tulaga ua iai lea suesuega ae o lana faamatalaga e lei mae‘a, peitai ua faailoa mai ese molimau ua mae‘a le suesuega ma ua taatia atu ile sui Komesina mo sana faaiuga.
Ole mataupu lenei oloo laumanuia ai male igoa ole Komesina o leoleo ma na faailoa mai e Afamasaga ile feiloaiga muamua e faia moliaga ini leoleo poo se leoleo e maua molimau ua aafia ile teuina ole aupega ile vaega oloo teumalu ai laau malosi a leoleo, aemaise o lea foi oloo ta‘ua e ni molimau, sa vaaia le Komesina o leoleo o ia umia ma tauaveina lea laau malosi e lē faatagaina ile atunuu, pe a alu ni osofaiga o laau faasāina.
O lea aupega na ave ele ofisa ole tiute i leoleo e faaleaga ona e lē faatagaina i Samoa, peitai e lei faia iai lea tulaga ae ua teu e leoleo oloo vaaia aupega poo laau malosi ona ose faatonuga mai le Komesina o leoleo oloo faamalolo lē tumau.
