Ole malie ose i’a e iai ona aogā tāua ile ola faanatura o meaola ole sami. Ose i’a foi e lelei lona aano ile tausami ma e pei ona silafia o Samoa ose atunuu e fiafia o tatou tagata e fagotaina le malie. Peitai ua tele gaioiga a nisi tagata o isi atunuu ua lamatia ai le maua pea o lenei i’a ole sami mo augatupulaga ole lumanai.
O upega tetele oloo faaaogā e vaa fagota lapopoa i ogasami loloto ua mamate ai malie e maua i ia ituaiga o upega fagota. O popolega o tagata e gafa ma le puipuia ole siosiomaga ma le ola faanatura o meaola ole sami e mamate malie i upega tetele ma lafoai e le faaaogāina. O nisi foi gaioiga a tagata fagogota ole fasi mate o malie ona ave lea oo latou apapa e faatau ae le faaaogāina le tino atoa ole i’a.
O Samoa ua avea nei ma se tasi o atunuu ole Pasefika ma le lalolagi ua na puipuia ma faasao malie ole sami. Ole afioga ile sui Palemia ole Minisita ole siosiomaga le afioga Fiame Naomi Mataafa na ia tatala aloaia le fono a Minisita ole siosiomaga ole Pasefika sa usuia ile vaiaso ua mavae i Samoa sa talanoaina ai auala o puipuiga ole malie. Na saunoa ai le sui Palemia ma ia faailoa le tāua ole malie ile olaga faanatura o meaola ole sami ma ole mafuaaga lea ole apo ma lagolago e le Malo taumafaiga uma mo le faasaoina ma le puipuia o lea i’a ole gataifale.
Ole Palemia ole atunuu susuga Tuilaepa L Sailele Malielegaoi na ia faasilasila aloaia le avea o Samoa ma se tasi o atunuu ole lalolagi ua lagolagoina le faasao ma le puipuia o malie ole sami ma sa ia afea foi i lana saunoaga le tāua ole malie. Peitai e leai se finagalo ole Palemia ma le sui Palemia na afea ai le tasi lea o i’a oloo fagotaina e le au tautai ole atunuu ma faatau lona aano auā e tofo lelei i mea tausami auā le tausiga ole tino maloloina.
Ua iloa i faamaumauga o atunuu ole Pasefika na muai avea ma nofoaga e faasao ma puipui ai le malie ma ose mitamitaga lea o Minisita ole siosiomaga sa fono i Samoa ona oloo tausolomua le Pasefika i taumafaiga uma e puipui malu ai malie mai le soona fagotaina ma faaaogā.
