O le teuina o tupe i ni teugatupe i faletupe ua faaaogā ai fesootaiga televavave poo le initaneti ua lapataia e le faletupe tutotonu o Samoa e tatau ona faaeteete i le soona tuuina atu ai o ni faamatalaga i nisi o loo faia ai fesootaiga e maua i imeli, poo le facebook.
Ua aliali mai e pei ona faaalia i se pepa o faamatalaga, o auala ia ua faaaogā e tagata e mafi i togafiti leaga e maua ai faamatalaga o teugatupe a tagata. O tagata nei e nonofo i isi atunuu o le lalolagi ua latou faia nei togafiti solitulafono.
O le mafuaaga lea o le fautua mai o le faletupe tutotonu ina ia tatau ona faaeteete i le soona tatala o se fesootaiga i luga o masini komepiuta ona e maua mai ai ni faamatalaga e foliga e moni ma faamaoni, ae peitai e lē o ni fesootaiga e talitonuina.
O faamatalaga e masani ona maua i ni fesootaiga i le imeli poo le facebook o le faapea mai e te maua se tupe tele pe a avatu faamatalaga e pei o upu e tatala ai sau imeli poo le password.
A lē o lena o le fai mai e lafo atu se tupe ae e te toe maua ai se isi faaopoopoga i le aofaiga o lau seleni o le a avatu e ala i le auala o tupe faamomoli poo le avatu i luga o le imeli e faaaogā ai lau teugatupe i le faletupe.
O le fautuaga malosi aua, aua, aua lava ne‘i seetia ai i ituaiga o fesootaiga faapea.
O le taimi lava e mamulu atu ai faamatalaga poo se tupe ua e faatofa loa i lau seleni o loo teu. I Samoa lava ia ua iai tagata ua aafia ai i nei faiga. Talu ai tulaga ua molimauina i le toe malosi mai o nei faiga ua fautuaina ai foi ma tagata ma pisinisi ia suia loa numera o a latou teugatupe e mafai ona tatala ai poo pin numbers, suia ma upu e tatala ma loka ai poo passwords, ma ia mataitu lelei au seleni.
O le taimi e vaaia atu ai ua iai se seleni ua aluese ae e te lei ioeina ona fesili loa lea i le faletupe tutotonu i Samoa. E toatele tagata o le atunuu ma pisinisi i fafo o loo faia teugatupe i le ANZ ma isi faletupe i lo tatou atunuu e tāua tele lenei tala mo outou, aemaise foi o nisi o le au penisione i Niu Sila ua mafai ona tala i Samoa a latou seleni e tatau ona silafia lenei tulaga ua aliali mai.
E lē o faailoaina mai e le faletupe tutotonu poo ua iai nisi ua aafia teugatupe talu ona toe molimauina nei faiga solitulafono.
O faletupe o le ANZ i Tonga, le Atu Kuki ma Samoa ua mataalia nei ia latou tagata o loo iai teugatupe ia latou faletupe faapea pisinisi.
