O le mau lea a le alii Palemia ina ua laga savali a nisi o sui o Safata i le vaiaso na tea nei i le Palemene. O le vaeluaga o le itumalo lea ua lagalagā ai nisi o finagalo a nisi o tamalii ma faleupolu o le Itumalo Malosi.
O le Aso Lua na tea nei lea na savalia ai e le Aiga Sa Tunumafono le Palemene ae o le Aso Gafua na maua ai lipoti na agai ai i latou ua ta‘ua o le Alataua ma feiloai ma le Palemia e tuu atu lo latou maliega i le vaevaega na tuu atu e le Malo e pei ona aofia i teuteuga o faigapalota, lea ua i lona faitauga lona lua i luma o le Palemene.
O le mau a le Alataua e talafeagai lelei fuafuaga ua iai i le vaeluaga ua iai nei o le aiga sa Tunumafono ma le Alataua.
O le mau a le savali lea na oo atu ma feiloai ma le Fofoga Fetalai atoa ai ma le Sui Palemia i le aso na sosoo ai na faaali ai atugaluga a le aiga sa Tunumafono ona o le mau e lē talafeagai lenei vaevaega i le faasinomaga o le atu Safata. O le mau a le aiga sa Tunumafono e tatau ona vaevae i le tulaga lea o Togamau ma ona tua, ma Siulepa ma ona tua.
O le vaeluaga talafeagai lea i le faaleaganuu e pei ona taatia ai le tulafono e vaevae Samoa faaleaganuu, o le mau lea a le savali tele lea ina ua feiloai ma le Palemene.
O le faamatalaga a sui o lea savali e aofia ai Tuia Pua Paepae Letoa, Afemata Tunumafono Apelu Aiavao, Anapu Aialii Solofa ma isi, o le vaevaega talafeagai lea o le itumalo e maua ai le filemu, ma afai foi e tagai i le vaevaega lea e laitiiti lava se va i le numera o tagata palota i itu e lua ae a alu ai i le finagalo o le malo o iai nei, e lē talafeagai ona o le mamao lava o le eseesega o le numera o tagata palota i le isi itu ma le isi.
O le faataitaiga afai ae alu ai i le vaevaega o Sa Tunumafono ma le Alataua, o le aofai o tagata e mafai ona palota mo Sa Tunumafono e 2,930 ae o le Alataua e 1,335 tagata palota ma o se eseesega tele lea; ae a agai i le Togamau ma ona tua, ma Siulepa ma ona tua, e 2,010 le aofai o le isi itu ae o le isi e 2,255 ua na o le 245 le eseesega.
Na talo se fonotaga a tusitala ma le afioga Leota Su‘atele o se sui foi lea na tulai mai i le tofi faipule o le itumalo i tausaga ua mavae ma na ia ta‘ua o ia na seei i le iloiloga o lenei mataupu ina ua amata ona saili e le Malo ma le Palemene se finagalo o le atunuu i le vaeluaina o itumalo faaalalafaga ia e taitoalua sui faipule o le Palemene.
Na mafua le laga o se suiga ona o le vaaia o le taatele o le faiga lea o le poloka o le palota i le isi sui e toalua ai sui faipule ma o se faiga na ta‘ua e Leota na telē ai le afaina o sui tauva ma o le tasi o le sui e palota i ai o le a taofia ai loa lea faiga.
O le komisi la na seei ai le afioga Leota Su‘atele na ia ta‘ua na agai atu ai lava le toatele o Safata ma le maliega i le vaevaega talafeagai o Safata pe afai o le a taitasi mai sui faipule o le Palemene ma o se faiga na ia ta‘ua foi e matuā fetaui lelei.
Ta‘ua e Tuia Paepae o ia le isi na saofai i le komisi suesue lea ma momoli popolega lea foi ua toe savalia nei le Palemene e toe silasila i ai ona e lē o taitai ona talafeagai lea vaevaega o iai aemaise lava i le faavae lea ua taatia e vaevae itumalo i le faaleaganuu.
