“E lē talafeagai se faasalaga faafalepuipui”…Faamasino
I le faaiuga a le alii faamasino o Pierre Slicer, na ia faaalia ai e iai le eseesega o se faasalaga pe ana fai o moliaga o le faaoolima matagā, ae o le solitulafono na faia o loo manino le faamasinoga sa malie i ai le tamaitai na aafia e ui sa ia faamatala sa ia faia ona o le manao e maua pea se galuega mo ia e tausi ai lona aiga. O le tamaitai na aafia sa faafaigaluega e Mulitalo ile taimi na tulai mai ai le solitulafono.
O le Aso Lulu, 25 o Iulai 2012 na fofogaina ai le faaiuga a le faamasinoga ma ua lē lauina ai le iuga i le aso 16 o Aukuso sa faatulaga muamua. Na faaalia e le loia a Mulitalo, o le mae‘a ona tuuina atu folasaga faaiu e fua i ai se faaiuga na aumai ai ma le faaiuga. O le aso tonu lea o loo tumutumu tusitala i le faatautoina o le Ao o le Malo i le maota fono o le Palemene, le mafuaaga na lē iloa ai le lauina o le iuga ae na faato‘ā maua le faaiuga tusitusia i le Aso Tofi na sosoo ai. O le tolu afe ua faatonuina Mulitalo na te totogi atu i le tamaitai na aafia, e 4 masina e togitogi ai ma le lua tausaga e nofo vaavaaia ai. O le lua tausaga lea e mafai ai ona toe valaauina lē ua molia e tulai i le faamasinoga pe a lē usitaia le vaega lea o le faaiuga. Ua faasalaina foi Mulitalo e faia ni galuega mo le lelei o le atunuu e leai se totogi. E 26 itula na te faia ai ia galuega i lalo o le vaaiga a le ofisa faanofo vaavaaia.
Faaalia e le loia sa tulai mo lē ua molia, le faafiafiaina i le faaiuga ona ua talia e le faamasinoga sana talosaga na ave i lana folasaga, ina ia silasila le faamasinoga i le soifua tautua o lē ua molia mo le tele o tausaga, e lē gata i le malo, ae o lona nuu ma le ekalesia.
E pei ona silafia o le tofa Mulitalo sa avea ma faipule o le Palemene mo ni paea‘iga se tolu ma sa filifilia foi e avea ma minisita o le Kapeneta. Sa avea foi ma se tasi o Komesina o le Komisi e Pulea tagata faigaluega a le Malo le PSC poo le Public Service Commission.
O le itumalo o Faasaleleaga numera 4 sa tulai mai ai o ia i le tofi faipule ma o se tasi o sui sa lagolago malosi i le vaega faaupufai e puipuia aia tatau a tagata le HRPP.
