O le manumalo ale Brumbies i ‘ai e 24-10 a le Western Force ua avea ai nei ma le ‘au pito i i luga a Ausetalia ile tauvaga Super Rugby 2016. O le ‘au foi lea e tasi a Ausetalia ua sao atu i le tauvaga o le pa‘ū ma nofo a ‘au e valu o totoe ile tauvaga o le 2016.
O lenei foi ‘au o alo lava o Samoa oloo taulamua ai e pei o Allan Alaalatoa, Aidan Toua, Nigel Ah Wong, Matt Toomua, Christian Lealiifano, Scott Sio ma Lausii Taliauli. O le au a Western Force na faia‘ina, ae na iloga le sikoa mataina a le alo foi o Samoa ia Ben Tapuai. O ‘au e valu pito i luga o le a fetaui mo le pa‘ū ma nofo o lenei tausaga e aofia ai le Hurricanes, Lions, Stormers, Brumbies, Highlanders, Chiefs, Crusaders ma le Sharks. O sikoa a le Brumbies na maua lea e Matt Tomua ma Tevita Kuridrani faapea kiki na ova a Christian Lealiifano ma Matt Tomua. Ae peitai o ‘ai e 10 a le Western Force sa maua ile sikoa a Ben Tapuai, ma na ova le kiki a Prior faapea se sala.
Ua alo atu nei le mamalu o le atunuu i Ausetalia e lagolagoina lenei ‘au e tasi, o le a tu‘i le mulipapaga ma tapuai nei alo o Samoa ua fesoasoani e toe faoa mai le siamupini sa masani ona manumalo ai i tausaga ua tea.
O le taaalo faatasi o Scott Sio ma Allan Alaalatoa ile Brumbies ua tauaveina ai pea le masani a o la tuaa ia Nua Tavita Sio ma Gisa Vili Alaalatoa sa taaalo faatasi ile Manu Samoa o le 1991 ile laina i luma.
